राष्ट्रिय गौरबको कालीगण्डकी करिडोरको ट्याक खुल्यो

0
203

चीन र भारतलाई जोड्ने राष्ट्रिय गौरबको कालीगण्डकी करिडोरको ट्याक खुलेको छ । नेपाली सेनाको निर्माण कार्यदलले करिडोरको बागलुङ खण्डमा बाँकी रहेको २६ किलोमिटरमा नयाँ ट्र्याक निर्माण गरेपछि भारतको सुनौली नाकादेखि चीनको स्वशासित क्षेत्र तिब्बतको कोरला नाका (उपल्लो मुस्ताङ) सम्मको ३ सय ४५ किलोमिटर दुरीको ट्याक खुलेको हो।

यो वर्ष करिब ३३ करोड रुपैयाँ खर्चेर बागलुङ खण्डको ट्र्याक खोलिएको नेपाली सेनाको निर्माण कार्यदलले जनाएको छ । निर्माण कार्यदलका सहायक रथी उद्धब विष्टले सडकको सुधार र विस्तार गर्नुपर्ने भए पनि अब गाडी गुड्न सक्ने बनाइएको जानकारी दिनुभयो । बागलुङ खण्डमा मात्रै करिब ५६ करोड रुपैयाँ खर्च भएको उहाँले बताउनुभयो ।

करिडोरको ट्याक खुलेपछि अब सुनौलीबाट पाल्पा, गुल्मी, बागलुङ, म्याग्दी, मुस्ताङ हुँदै कोराला पुग्न सकिने करिडोर निर्माण कार्यदलका प्रमुख रेश्मिराज भट्टराईले बताउनुभयो । ’दुई देशलाई जोड्ने छोटो सडक निर्माण भएको छ,’ भट्टराईले भन्नुभयो, ’ निकै जोखिम मोलेर ठूला भिर–पहराहरुलाई फोर्दै ट्र्याक खोल्यौं। ’

असार मसान्तसम्म ट्र्याक खोल्ने प्रतिबद्धता जनाएको सेनाले एक साताअघि बिहीबार नै ट्र्याक खोलेको जनाएको छ ।नेपाली सेनाको निर्माण कार्यदलका अनुसार बागलुङ जिल्लाका चारवटा करिडोर क्षेत्रका खोलामा बेलिब्रिज निर्माण गर्नुपर्ने छ ।

करिडोरको ट्याक खुलेसंगै अव भारतीय पर्यटकहरु कालीगण्डकी नदीको किनारै किनार भएर हिन्दु र वौद्धधर्मावलम्वीहरुको प्रशिद्ध तीर्थस्थल मुक्तिनाथ जान र चीनका बौद्ध धर्मावलम्बी पनि सोही मार्ग हुँदै लुम्बिनी पुग्न सक्नेछन् । यो करिडोरले नेपाल,भारत र चीनको त्रिदेशीय व्यापार अभिवृद्धि गर्न सघाउ पु¥याउनुका साथै भारत र चीनबीच ‘कनेक्टिभिटी’को काम गर्ने स्थानीय सरकोकारवालाहरुले बताएका छन् । करिडोरमा मुक्तिनाथ, गलेश्वर, बागलुङ कालिका, सेतीवेणी, रिडी, रानीघाट, राम्दी लगायत प्रसिद्ध मठ–मन्दिर रहेकाले धार्मिक रुपमा पनि महत्वपूर्ण रहेको छ ।
करिडोरको नवलपरासीदेखि बागलुङको मालढुंगासम्म २८ मोटरेबल पुल बनाउनुपर्ने कालीगण्डकी करिडोरको आयोजना कार्यालयले जनाएको छ । ट्र्याक खोलेपछि आगामी वर्षबाट कालोपत्रे सुरु गर्ने तयारी छ । धु्रबसागर शर्मा