ब्रेनट्युमर ग्रसित दग्नामी गर्बुजालाई बहराईनबाट सहयोग

0

रघुगंगा गाउँपालिका–४ दग्नामकी १५ वर्षीया किशोरी अरुणा गर्बुजाको उपचारका बहराईनमा रहेका म्याग्देलीले आर्थिक सहयोग गरेका छन् ।गर्बुजाको उपचारमा सहयोग जुटाएका दग्नाम बैदेशिक सहयोग समितिका अध्यक्ष सुशिल गर्बुजा र सल्लाहकार लेस बहादुर बुदुजाले परोपकारी संस्था ओमकुमारी शान्ति कोषलाई संकलित ८० हजार रुपैयाँ हस्तान्तरगा गरेका हुन् ।

काठमाडौं क्यान्सर हस्पिटल सेन्टरमा उपचार गराइरहेकी गर्बुजाको उपचारमा आर्थिक समस्या भएपछि परिवारले सहयोगको याचना गरेपछि कोषले आर्थिक सङ्कलन सुरू गरेको थियो । उपचारका लागि ठुलो रकम लाग्ने डाक्टरहरुले बताएपछि आर्थिक अभावमा उपचार रोकिएको गर्बुजालाई स्वदेश तथा विदेशमा रहेका म्याग्देलीले आर्थिक सङ्कलन गरी उपचार कोषका अध्यक्ष राजेश शाक्यले बताए ।

सहयोग हस्तान्तरण कार्यक्रममा आर्थिक अभावकै कारण मृत्युवरण गर्नुपर्ने अवस्थाको अन्त्य गर्ने जिल्लामा स्थापन भएको कोषले अहिलेसम्म ४० जनाको उपचार गरेको छ भने ५ जना उपचारको क्रममा रहेका छन् ।आर्थिक अवस्था कमजोर भएकाहरुको उपचारमा सहयोग जुटाउने गरेको कोषले १ लाख देखी ३० लाखसम्म एउटै विरामीको उपचारमा सहयोग जुटाउने गरिएको संस्थाका सचिव लोकेश पुनमगरले बताए ।

बहराईनमा रहेका म्याग्देलीले कोषको १ करोड ५० लाखको अक्षय कोष स्थापना गर्ने अभियानमा १८ लाख संकलन भएको थियो । यसैबीच आर्थिक अवस्था कमजोर भएका म्याग्देलीको उपचारमा सहयोग गर्ने गर्बुजा र बुदुजालाई स्वागत तथा सम्मान गरिएको थियो । सम्मान कार्यक्रमको अध्यक्षता कोषका शाक्य, सञ्चालन सचिव लोकेश पुन र समापन उपाध्यक्ष हरिकृष्ण गौतमले गरेका थिए ।