Site icon BeniOnline.com.np जिल्लाका ताजा अनलाइन समाचार

बन्यो लभ्लीहिल पुग्ने पदमार्ग निर्माण, भब्य समारोहका बिच उद्घाटन (फोटो फिचर)

पछिल्लो समय निकै चर्चा बटुलेको पर्यटकीयस्थल लभ्लीहिल पुग्नका लागि बेनीदेखि पक्की पदमार्गको आइतबार उद्घाटन गरिएको छ । आन्तरिक तथा बाह्य पर्यटकहरुलाई बेनीदेखि नजिकै बेनी नगरपालिका–२, ज्यामरुककोटस्थित खबरा गाउँमा रहेको पर्यटकीयस्थल लभ्लीहिल पु¥याउन बनाइएको पदमार्गको प्रतिनिधिसभाका सदस्य भुपेन्द्रबहादुर थापाले उद्घाटन गरे ।

उद्घाटनपछि लभ्लीहिलमा आयोजित कार्यक्रममा बोल्ने बक्ताले बेनी नगरपालिका, प्रवासी म्याग्देलीहरुको संस्था मोना आइईसी र म्याग्दी उद्योग वाणिज्य संघको त्रिपक्षीय साझेदारीमा निर्मित पदमार्गले जिल्लामा लगानी भित्राउने वातावरण बनाएको बताएका थिए ।‘मोनासँग सहकार्य गरी जिल्लामा धेरै काम गर्न सकिन्छ,‘समुदाय केन्द्रिय कार्यहरूमा सक्रियता देखाउनुहोस्’ थापाले भने ।

उनले जिल्लामा मोनाका कार्यहरुबाट उत्साहित हुने ठाउँ भएपनि राजनीतिकबाट टाढा रहेर जिल्लाको हितमा केन्द्रित भएर काम गर्न अनुरोध समेत गरेका थिए । सोही अवसरमा संविधान सभाका सदस्य गोविन्द पौडेल, गण्डकी प्रदेशका सांसद विनोद केसीले पर्यटन, जलविद्युतको क्षेत्रमा लगानीको वातावरण रहेको बताए ।

बेनी नगरपालिकाका मेयर हरिकुमार श्रेष्ठले नगरपालिकाले पहिलोपटक प्रवासी म्याग्देलीसँग साझेदारी गरेर समयमै पदमार्ग सम्पन्न गरेको बताउँदै थप योजना आगामी दिनमा समेत समृद्ध नगरपालिका बनाउने अभियानमा सहयोगको अपेक्षा गरेका थिए । उद्घाटपछि पदैलमार्ग हुदै लभ्लीहिलमा पुगेर आयोजित कार्यक्रममा प्रमुख जिल्ला अधिकारी ज्ञाननाथ ढकाल, नेपाली कांग्रेस म्याग्दीका सचिव मिनबहादुर कार्की,कार्यक्रममा वडा नं २ का अध्यक्ष हिराबहादुर थापा, मोनाका संस्थापक अध्यक्ष प्रकाश पुन,मोनाका पदमार्ग संयोजक ओमनारायण जुग्जालीले मन्तब्य राखेका थिए । कार्यक्रममा पदमार्ग निर्माणमा सहयोग गर्ने सहयोगदातालाई सम्मान गरिएको थियो ।

सोही अवसरमा बेनपा ७ का वडा अध्यक्ष राजेन्द्रकुमार श्रेष्ठले स्वर्गिय पिताको सम्झनामा निर्मित मुखिया बिश्रामस्थलको संघीय सांसद भुपेन्द्रबहादुर थापाले र लभ्लीहिलमा निर्मित बाटिकाको गण्डकी प्रदेशका सांसद विनोद केसीले उद्घाटन गरेका थिए । डिभिजन बन कार्यालयको आर्थिक सहयोग तथा स्थानीय उपभोक्ताको समेत जनश्रमदानबाट निर्मित बाटिकाको उद्घाटन संगै अवलोकन समेत गरिएको थियो । पदमार्ग निर्माणका लागि क्रमशः बेनपाले ५०, मोना आइईसीले ४० र म्याग्दी उद्योग वाणिज्य संघले १० प्रतिशत रकम बेहोर्ने गरी त्रिपक्षीय साझेदारी भएको थियो ।

जसअन्तरगत मोना आईईसीबाट २९ लाख ८९ हजार ४४४, बेनी नगरपालिका ३७ लाख ३६ हजार ८०५ र म्याग्दी उद्योग वाणिज्य संघले ७ लाख ४७ हजार ३६० सहयोग गरेको थियो । उद्घाटन कार्यक्रमको अध्यक्षता म्याग्दी उद्योग वाणिज्य संघका अध्यक्ष उत्तमकुमार कर्माचार्य, स्वागत मोना आईईसीका अध्यक्ष चक्रबहादुर थापा, आर्थिक प्रतिवेदन पदमार्ग ब्यवस्थापन समितिका कोषाध्यक्ष सुनिता केसी र सञ्चालन म्याग्दी उवासंघका सचिव सुर्वण रिजालले गरेका थिए ।

‘मोना–बेनी–लभ्लीहिल’ नाम राखिएको पदमार्गको गएको वर्ष भदौ ८ गते शिलान्यास गरिएको थियो । आन्तरिक तथा बाह्य पर्यटकलाई सहज आवतजावतका साथै नगरपालिकाभित्रका पर्यटकीय गन्तव्यलाई चिनाउन लागि पदमार्ग निर्माण गरिएको बेनी नगरपालिकाले जनाएको छ । पदमार्गको ६ सय ६० मिटर पदमार्ग बनेको छ । २ मिटर चौडाइको सिँढीमा ६ इन्च उचाई रहेको छ भने पैताला १२ देखि १४ इन्चसम्म रहेकोमा पदमार्गको दुवैतर्फ रेलिङ हालिएको छ ।

Exit mobile version