भरतपुर महानगरपालिकाको रामपुरमा निर्माणाधीन गौतमबुद्ध अन्तर्राष्ट्रिय क्रिकेट रंगशालाको डीपीआर तयार भएको छ । धुर्मुस–सुन्तली फाउन्डेसनले बनाउने रंगशालाको विस्तृत परियोजना प्रतिवेदन समपन्न भएको एक कार्यक्रम मार्फत जानकारी गराइएको छ ।

२० विगाहा ६ कठ्ठा क्षेत्रफलमा बन्ने रंगशाला ३० हजार जना अट्ने क्षमताको हुनेछ । पहिला २५ हजार दर्शक मात्र अट्ने बनाउने भनिएकोमा ५ हजार क्षमता थपेर डीपीआर तयार गरिएको हो । रंगशालामा दुई भीआईपी प्याराफिटसमेत रहनेछन्।‘क्रिकेट स्टेडियमसँगै फुटबल मैदान, स्वीमिङ पुल र कभर्ड हल पनि निर्माण गरिने छ । ती सबै संरचनाको डीपीआर तयार भएको छ ।’

फाउण्डेशनका अध्यक्ष सीताराम कट्टेल (धुर्मुस) ले भने, ‘तर निर्माणको थालनी भने क्रिकेट स्टेडियमबाट हुनेछ ।’क्रियटिभ डिजाइन आर्किटेक प्रा.लि.को नेतृत्वमा भारतीय र अमेरिकन कन्सल्टेन्सीको सहयोगमा डीपीआर तयार गरिएको हो । तिहारलगत्तै संरचना निर्माणको काम सुरु गर्ने र दुई वर्षभित्र सम्पन्न गर्ने योजना फाउन्डेशनले बनाएको छ ।

विज्ञापन