बिम बस दुर्घटनामा ज्यान गुमाएकाको परिवार र घाईतेलाई सहयोग

0

म्याग्दीको मालिका गाउँपालिका–७, बिममा बस दुर्घटनामा ज्यान गुमाएकाको परिवार र घाईतेको उपचारमा बिम मालिका सघं काठमाण्डौले आर्थिक सहयोग गरेको छ । बिम मालिका संघ विदेश विभागले संकलन गरेको ७ लाख ५८ हजार सोमबार एक कार्यक्रम गरी हस्तान्तरण गरिएको छ ।

संघका अध्यक्ष सुवेदार देउप्रसाद जुग्जाली, सचिव याम बहादुर फगामीको उपस्थितीमा वडा कार्यालय बिममा आयोजित कार्यक्रममा दुर्घटनामा मृत्यु हुने चार जनाको परिवाार,दुर्घटनामा अप्रेसन गर्नुपर्ने ३ जना र पूर्ण रुपमा आराम गर्नुपर्ने ३ जनालाई प्रतिब्यक्ति ४० हजार, थप उपचारका लागि पोखरा रिफर गरिएका ११ घाईतेलाई २५ हजार र बेनी अस्पतालमा उपचार गरी घर फर्किएका १४ जनालाई ५ हजारको दरले सहयोग हस्तान्तरण गरिएको वडा अध्यक्ष रेशम जुग्जालीले जानकारी दिए ।

उनका अनुसार दुर्घटनामा घाईते बाहेक मृगौला पीडित, आगलागी, करेन्ट लगायतका अन्य बिरामीलाई समेत १ लाख ३८ हजार ५ सय रुपैयाँ हस्तान्तरण गरिएको थियो । बिम मालिका संघ विदेश विभागका संयोजक कृष्ण जुग्जालीले दुर्घटनाले विदेशमा रहेका बिमबासी स्तब्ध भएको बताउँदै राहत संकलन गरिएको बताए । उनका अनुसार आर्थिक सहयोग अभियानमा सहयोग गर्ने सम्पूर्ण सहयोगदातालाई धन्यवाद ब्यक्त गरेका थिए ।

सहयोग हस्तान्तरण कार्यक्रमा प्रवासमा रहेका बिसबासीले गाउँको विकाससँगै विभिन्न समस्यामा साथ दिएको बताएका थिए । गएको कात्तिक महिनामा दरबाङबाट छुटेको ग १ ख ४४७६ नम्बरको बस बिमको गलघण्टीमा पुगेर दुर्घटना गुल्मी कालीगण्डकी गाउँपालिका–२, अर्बेनीको ३० वर्षीया विष्णु पाण्डे, मालिका–७, बिमकी ७० वर्षीया सतदेवी भट्टचन, बिम गाउँका ९ वर्षीय बालक रवि जुग्जाली र ११ वर्षीया आयुसा जुग्जालीको घटनास्थलमै मृत्यु भएको थियो ।

सहयोग रकम विद्यालय र कोषलाई हस्तान्तरण
मृतक ११ वर्षीया आयुसा जुग्जालीका बुबा एवम् वडा अध्यक्ष रेशम जुग्जालीले ४० हजार नगदमा थप १० हजार थपेर बिम मालिका संघको अक्षय कोषलाई हस्तान्तरण गरे । ‘छोरीको सपना पुरा गर्न सकिन्,‘अव उनको सपनालाई सहयोग गरेर पुरा गर्ने प्रयास गर्छु’ जुग्जालीले बेनीअनलाइनलाई भने ।

उनले छोरीको नाममा भविस्यमा कोषको स्थापना गरी विभिन्न रचनात्मक कार्यहरु गर्ने बताए । त्यस्तै दुर्घटनामा ज्यान गुमाएकी ७० वर्षीया सतदेवी भट्टचनकी छोरी ज्ञानु भट्टचनले आमाको नामबाट किसानी माविलाई ४० हजार हस्तान्तरण गरेकी छन् । उक्त सहयोग हस्तान्तरण कार्यक्रममा स्थानीय प्रतिनिधि, विद्यालयका प्रधानाध्यापक जंगबहादुर गर्बुजा लगायतको उपस्थिती रहेको थियो । सहयोग हस्तान्तरण कार्यक्रममा उपचारमा समस्या भएका बिरामीलाई सहयोगले राहत मिलेको बताइएको थियो ।

Leave a Reply