कतारको स्वास्थ्य मन्त्रालयले आज शुक्रवार कोरोनाको पछिल्लो २४ घण्टाको विवरण सार्वजनिक गर्दै थप ७ जनाको मृत्यु भएको जनाएको छ ।

मृतकहरू ३४, ४०, ६४, ६५, ६९, ७१ र ७७ वर्ष उमेर समूहका रहेका छन् । यो सङ्ख्या आज सम्मकै उच्च सङ्ख्या हो । कतारमा करोनाका कारण मृत्यु हुनेहरूको सङ्ख्या ९३ पुगेको छ । थप ३८३१ जनामा परीक्षण गर्दा १,०२१ जनामा सङ्क्रमण देखिए सँगै कुल सङ्क्रमित हुनेको सङ्ख्या ८५ हजार ४६२ पुगेको जनाएको छ l

१ हजार ७६७ जना सहित कुल स्वास्थ्य लाभ गर्नेको सङ्ख्या ६५ हजार ४०९ पुगेको छ ।ती मध्ये १ हजार १५७ जनालाई डाक्टरहरूको प्रत्यक्ष निगरानीमा राखिएको छ भने १६० जनालाई अस्पताल भर्ना गरिएको छ।

थप १६ जना सहित आइसियुमा रहने बिरामीको सङ्ख्या २२१ पुगेको छ । १९ हजार ९६० जनाको उपचार चलिरहेको छ । ४ लाख भन्दा बढी नेपाली कार्यरत रहेको कतारमा कोरोनाका कारण क्वारेन्टाईनमा रहेका म्याग्दीका एक युवाले झुन्डिएर आत्महत्या गरेका छन् ।

उनी सहित कोरोनाका कारण कतारमा मृत्युवरण गर्ने नेपालीको सङ्ख्या ५ पुगेको छ । नयाँ सङ्क्रमितहरू स्थानीय नागरिक सहित फरक फरक समुदायका आप्रवासी कामदारहरू रहेका छन्। कतारमा आजसम्म कुल ३ लाख १३ हजार ५०१ जनामा कोरोनाको परीक्षण गरिएको छ ।

स्वास्थ्यमा कुनै समस्या भएमा टोल फ्री नम्बर १६००० मा कल गर्न समेत अनुरोध गरिएको छ l कोरोनाको प्रारम्भिक लक्षण देखिएमा मैदर, अल रवादत, उमसलाल अलि र गराफामा रहेका हेल्थ सेन्टरमा गएर परीक्षण गर्न अनुरोध गरेको छ l