बेनी नगरपालिका–६, एकपाटेमा रहेको राम पशुपंक्षी फार्ममा हरेक गाई र भैसीलाई पानीको धारो र घाँस खाने ठाउँ छुट्टै छ । ९ वटा भैसी र २ होलिस्टन गाईलाई तिर्खा लागेमा धारोमा पानी आउँछ । गोठलाई मार्बलको टायलले चिटिक्क पारिएको छ । गोठ सधै सफा देखिन्छ । फार्मका सञ्चालक राम पौडेललाई पटक–पटक पानी बोकेर गोठमा जानुपदैन् । घाँसदाना लुछाचुँडी गर्लान भन्ने चिन्ता पनि छैन् । दानापानीका लागि फार्मभित्र गरिएको ब्यवस्थापनले कामदार राख्नुपर्ने झन्झट समेत सञ्चालम पौडेललाई छैन् । रोजगारको खोजीमा विदेशमा जान काठमाण्डौमा पासर्पोट बुझाएर फर्किएका पौडेलले पशुपालनमा सक्रिय भएपछि पासर्पोट च्यातेर फालिदिन समेत दलाललाई फोनबाटै जानकारी गराएको बताए ।

करिब पाँचबर्षदेखि ब्यवसायीक पशुपालनमा सक्रिय रहेका यूवा पौडेलले दुध बिक्रीबाट राम्रो आम्दानी हुन थालेपछि जिल्लामै नमुना फार्म बनाउने अभियानमा जुटेका छन् ।‘गाईभैसीलाई दानापानीमै धेरै समय लाग्थ्यो,‘अहिले समयको बचत भएको छ’ पौडेलले भने । उनका अनुसार फार्मलाई आधुनिक रुपमा ब्यवस्थापन गरेकाले कामदारको समेत आवश्यकता नभएको बताए ।

‘पहिले दानापानी खुवाउँन दुईघण्टा लाग्थ्यो, अहिले छुट्टाछुट्टै बनाइदिएपछि २० मिनेट पनि लाग्दैन’ पौडेलले भने । घरपरिवारबाटै दानापानी र आवश्यक सरसफलाई गर्न सकिने भएपछि आम्दानी बढेको उनको भनाई छ । दैनिक ८० लिटरको हाराहारीमा दुध बेनीबजारमा लैजाने गरेका पौडेलले मासिक डेढ लाखको कारोबार गर्ने बताए । ‘मासिक ६० हजार नाफा छ,‘दुई लाखसम्म कमाउने योजना बनाएको छु’ पौडेलले भने । उनले एउटा होलिस्टन गाईबाट मासिक ५० हजारको दुध उत्पादन हुने बताए ।मासिक १८ सय लिटर दुधलाई प्रति लिटर ८० देखि १ सय रुपैयाँसम्म विक्री गर्ने गरेका छन् ।

जिल्ला मालपोत कार्यालयका कर्मचारी समेत रहेका पौडेलले विहानबेलुकी दुध लिएर बेनी जाने गरेका छन् ।उन्नतजातका घाँस खेती समेत सुरू गरेका पौडेलले घाँस काट्ने मेसिन समेत जडान गरेका छन् । दुईबर्ष भित्र गाईभैसीको संख्या दोब्बर पु¥याउने योजनामा रहेका पौडेललाई भेटेरिनरी अस्पताल पशुसेवा विज्ञ केन्द्र म्याग्दीले साना मोडल फार्म अन्र्तरगत २ लाख ५० हजार अनुदान दिएको छ । अनुदानसँगै पौडेलले थप ५ लाखको लगानीमा फार्म विस्तार गरेको कार्यालयमा बरिष्ठ प्राविधिक सुवास रेग्मीले बताए । ‘गाईभैसी पिच्छे गोठमै धारा जडान गरेको यो पहिलो फार्म हो,‘अनुदानको पूर्णरुपमा सदुपयोग भएको छ’ रेग्मीले भने । उनका अनुसार कार्यालयबाट उपलब्ध गराइएको अनुदानको सदुपयोग गर्ने किसानहरू ब्यवसायीक रुपमै नमुना बन्दै गएको बताए ।

जिल्लामा ५ वटाभन्दा धेरै गाईभैसीपालनमा सक्रिय कृषकको संख्या ३५ जनाको हाराहारीमा रहेको बताए । म्याग्दी दुध उत्पादनमा आत्मनिर्भरतर्फ उन्मुख भइरहेको कार्यालयले जनाएको छ । सदरमुकाम बेनीमा छिमेकी पर्वतको जलजला गाउँपालिबाट आउने दुध ह्वात्तै घटेको छ । बेनीबजारमा दैनिक २५ सय लिटर दुध नगरपालिका भित्रबाटै खपत हुने गरेको छ ।