साहसिक पर्यटकीय पूर्वाधार बढेसँगै पर्वतमा पछिल्ला केही महिनायता आन्तरिक तथा बाह्य पर्यटकहरूको आकर्षण बढेको छ । पर्वत सदरमुकाम कुश्मा विभिन्न संघसंस्थाहरूबाट अवलोकन भ्रमणका लागि गन्तव्य स्थल बन्दै गएको छ । कुश्माबजारमा बनेको विश्वकै दोस्रो अग्लो बञ्जी जम्प, विश्वकै दोस्रो लामो सुपरम्यान शैलीको जिपलाइन, नेपालकै अग्ला र लामा झोलुंगे पुलले आन्तरिक पर्यटकहरूलाई आकर्षित गरेको हो । दैनिक हजारौँको संख्यामा आन्तरिक पर्यटक यहाँ भित्रिने गरेका छन् ।

पर्यटकको संख्या बढेसँगै कुश्माबजारका होटल भरिभराउ हुन थालेका छन् । होटल सञ्चालकहरूक अनुसार एक साताअघिदेखि नै होटल बुकिङ हुन थालेको छ । पर्यटकीय पूर्वाधार बढेसँगै कुश्माबजारमा सुविधासम्पन्न होटलसमेत थपिन थालेका छन् । चैतेदसँैमा हिमालपारिको जिल्ला मुस्ताङको कागबेनीमा श्राद्ध गर्न जाने भक्तजनका कारण पनि पर्वत सदरमुकाममा चहलहपल बढ्न थालेको हो । मुस्ताङ जाने दर्शनार्थी र अन्य पर्यटकहरूले जाने बेलामा र फर्किने बेलामा बास बस्नका लागि होटल बुकिङ गर्ने गरेको होटल बन्दनाका सञ्चालक कृष्णप्रसाद श्रेष्ठ जानकारी दिए ।

उनका अनुसार नेपालका चितवन, विराटनगर, हेटौँडा, दोलखा, नेपालगञ्ज, बर्दिया, दाङ, बुटबल, कपिलवस्तुलगायत क्षेत्रबाट शैक्षिक संघसंस्था, सहकारी संस्था, विभिन्न सामुदायिक संघसंस्थाबाट शैक्षिक तथा अवलोकन भ्रमणका लागि यस क्षेत्र आउने क्रम बढ्दो रहेको छ । कतिपयले पर्वतलाई गन्तव्य बनाउने गरेका छन् भने कतिपय बागलुङबाट म्याग्दीतर्फ जाने गरेको होटल व्यवसायी बताउँछन् ।

पहिल्ला केही दिनयता सदरमुकामका सुविधासम्पन्न मानिने बन्दना, बेन्जुु, माउन्टेन भ्यू, फ्रेन्डली, धवलागिरि, मुस्ताङ, ओरियन्टलगायत होटल भरिभराउ रहेको सञ्चालकहरूको भनाइ छ । यता बञ्जी जम्प र जिपलाइनमा समेत एक हप्ताअघिदेखि नै टिकट बुक भइसकेको त्यहाँका सञ्चालकहरूले बताए । आन्तरिक पर्यटकको चाप अत्यधिक भएसँगै सवारी साधन पार्किङको समस्या देखिएको छ । सवारी साधन बजारका भित्री सडक र पर्यटकीय पूर्वाधार नजिकै पार्किङ गर्दा दुर्घटनाको जोखिम बढेको सवारी चालकहरूको गुनासो छ ।

Leave a Reply