काठमाडौंको चाबहिलस्थित सेन्ट लरेन्स कलेजमा मंगलबार एकाएक विद्यार्थीले नाराबाजी गर्न थाले। कलेजका शिक्षकले नै छात्रामाथि यौन दुव्र्यवहार गर्ने गरेको आरोप लगाएपछि उनीविरूद्ध बिहानै विद्यार्थीहरू नाराबाजीमा उत्रिएका हुन्।

कलेजको बिहानी सत्रका संयोजकसमेत रहेका शिक्षक जनार्दन अधिकारीमाथि कक्षा ११ मा अध्ययनरत एक छात्राले तीन महिनादेखि आफूलाई सामाजिक सञ्जाल र भौतिक रूपमै दुव्र्यवहार गर्ने गरेको आरोप लगाएकी थिइन्। जुन कुरा उनले आफ्ना परिवार र कलेजका साथीलाई जानकारी दिएकी थिइन्। त्यसपछि विद्यार्थी आन्दोलित भएका हुन्।

ती छात्राले आरोप सार्वजनिक गरेपछि सोही कक्षामा अध्ययनरत अन्य दुईजना छात्राले पनि आफूसँग दुव्र्यवहार भएको खुलाएका थिए। उनीहरूले थप अर्का शिक्षक राजनकुमार पौडेलमाथि पनि आरोप लगाएका छन्। तीन महिनादेखि आफूमाथि शारीरिक दुव्र्यवहार गर्ने गरेको र त्यसलाई रोक्न खोज्दा ‘तलाई निष्कासन गर्दिन्छु’ भन्ने धम्की ती शिक्षकले दिने गरेको आरोप छात्राको छ।

‘आफ्नो दाइ वा भाइसँग बेन्चमा बसेका बेला त्यहाँ नबस, तिमीलाई बेन्चमै सेक्स गर्दिन्छु भन्ने रहेछन्,’ ती छात्राका एक सहपाठी साथीले भने, ‘विल यु बि माई बेड पार्टनर? तिम्रो घर टाढा छ, मेरै घरमा बस, भाडा पनि लिन्नँ। कलेज फी पनि तिर्दिन्छु। बस तिम्ले मेरो बेडको सेटिस्फिकेसन पूरा गर्नुपर्‍यो। यसो भन्ने रहेछन्।’

त्यस्तै ‘तिम्ले मिनिस्कट लगाएको सेक्सी देखिन्छ’ लगायत विभिन्न यौन दुव्र्यवहारजन्य शब्द प्रयोग गर्ने गरेको ती छात्राहरूले सुनाएको उनका साथीले बताएका छन्। आरोप लगाउने पीडित एक छात्राले ती शिक्षकले बारम्बार आफ्नो ‘सेक्स पार्टनर’ बन्न प्रस्ताव गर्ने गरेको बताइन्। ‘म पत्नीबाट सेटिस्फाइ (सन्तुष्ट) छैन।

तिमी मलाई मनपर्छ, त्यसैले मेरो पार्टनर बन भनेर बारम्बार भनिराख्ने,’ उनले भनिन्, ‘केही इग्नोर गर्दा धम्क्याउने, निष्कासन गर्दिन्छु भन्ने। बाध्य भएर अहिले बोल्नुपर्‍यो।’ ती छात्राले आफूसँग हुने कुराकानीबारे अभिभावक वा कलेज प्रशासनलाई जानकारी दिएमा तत्काल कलेजबाट निष्कासन गर्ने धम्की पनि दिएका थिए।

कलेज प्रशासनले उक्त घटनाबारे जानकारी पाउनेबित्तिकै आरोपित शिक्षक अधिकारीलाई कलेजबाट निष्कासन गरेको कलेजका प्रधानाध्यापक पुरुषोत्तम महर्जनले बताए। उनले भने, ‘छात्राले कुरा उठाउना साथ हामीले उनीहरूलाई निष्कासन गरिसक्यौं। प्रहरीले घटनाको अनुसन्धान गर्दै छ। हामी सहयोग गर्छौं।’

विद्यार्थीले कलेजमा यसरी धर्ना र नाराबाजी गरेपछि महानगरीय प्रहरी वृत्त गौशालाबाट प्रहरी टोली कलेजतर्फ गएको थियो। त्यसपछि आरोपित दुवैजना शिक्षक अधिकारी र पौडेललाई प्रहरीले नियन्त्रणमा लिएर वृत्तमा राखेको छ। ‘हामी पुग्दा शिक्षकबाट छात्राहरूमाथि यौन दुव्र्यवहार भएको भनेर नाराबाजी भइरहेको थियो। त्यसपछि पीडित छात्राहरूबाट जाहेरी दिन भन्यौं,’ वृत्तका इन्चार्ज प्रहरी नायब उपरीक्षक (डिएसपी) केशव भट्टले भने, ‘जाहेरी लिएपछि आरोपितलाई पक्रेर अनुसन्धान थालेका छौं।’

उनका अनुसार तीनजना छात्राले आफूमाथि दुव्र्यवहार भएको दाबी गर्दै किटानी जाहेरी दिएका छन्। जसमा दुवैजना आरोपित शिक्षकमाथि दुव्र्यवहारको किटानी दाबी गरिएको छ। डिएसपी भट्टका अनुसार प्रहरीले दुवैजनालाई न्यायिक हिरासतमा राखेर अनुसन्धान अगाडि बढाउन मंगलबारै जिल्ला अदालत काठमाडौंबाट अनुमति पनि लिइसकेको छ। अदालतले पाँच दिनको समय दिएको छ। nagariknews.com

Leave a Reply