भारतीय सेनाको जागिरपछि स्वेदश फर्केका रमेश खड्का पछिल्लो समय व्यवसायमा जमेका छन् । २ वर्षअघि जिल्लामै पहिलोपटक काँचो तयारी मःमको व्यवसाय शुरूआत गरेका उनले शुक्रवारदेखि ‘सुसारा बिन्स क्याफे’ सञ्चालनमा ल्याएका छन् ।
बागलुङ नगरपालिका–३ का ४० वर्षीय उनी सेनामा २० वर्ष सेवा गरेर हवल्दार पदमा निवृत्त भएका थिए । ‘थप पद लिनलाई जागिर बढाउन पनि सक्थे, स्वदेश आएर पनि अरु देशमा जान सकिन्थ्यो,’ उनी भन्छन्, ‘आफ्नै ठाउँमा बसेर केही गरौं भन्ने सोचले व्यवसायतिर लागें ।’
‘सुसारा फ्रोजन मःम’ र ‘सुसारा बिन्स क्याफे’मा गरी करीब १ करोड लगानी भएको छ । मःम व्यवसायमा १५ र ‘क्याफे’मा ५ जनाले रोजगारी पाएका छन् । ‘क्याफे’मा खड्कासहित उनका नातेदार सुशील खड्का र सागर थापाकोसमेत लगानी छ । मःम व्यवसायमा भने रमेश एक्लैको लगानी छ । ‘बागलुङमा काँचो तयारी मःमको बिक्री पहिलोपटक मैले नै शुरु गरेको हुँ,’ रमेशले भने, ‘यहाँ बनेको मःम म्याग्दी, पर्वत र मुस्ताङसम्म समेत जान्छ ।’ किमा भरेर तयार पारिएको मःमलाई विशेष रुपले ‘प्याकिङ’ गरेर बजार पठाइन्छ ।
दैनिक ६ देखि ७०० पिलेटसम्म मःम बिक्री हुने गरेको रमेशको भनाइ छ । खसी–बोकाको मःम प्रतिपलेट १०० रुपैयाँ, कुखुराको ६० रुपैयाँ, माछाको ७० रुपैयाँ र शाकाहारी मःमको ४५ रुपैयाँ पर्छ । छिट्टै केराको मःम पनि उत्पादन गर्ने लक्ष्य छ ।
मःमबाट मासिक करीब ५ लाख रुपैयाँ बराबरको कारोबार हुने गरेको छ । मःम व्यवसायलाई कम्पनीकै रुपमा अघि बढाउने र बजार पनि विस्तार गर्ने उनकोे योजना छ । उनलाई व्यवसायमा पत्नी रक्षाको दरिलो साथ छ । ‘व्यवसायबाट सन्तुष्ट छु, ठूलो मुनाफाको अपेक्षा मसँग छैन,’ रमेशले भने ।
बागलुङ उद्योग वाणिज्य संघका अध्यक्ष युवराज राजभण्डारीले शुक्रवार शुभारम्भ गरेको ‘क्याफे’मा चिया, कफीका साथै रेस्टुराँमा पाइने अधिकांश परिकार उपलब्ध छन् । बागलुङ बजारको केन्द्र भागमा खोलिएको ‘क्याफे’ले जिल्लामा भित्रने आन्तरिक तथा बाह्य पर्यटकलाई आकर्षित गर्ने उनले बताए ।
उनले विदेशबाट फर्केर आफ्नै ठाउँमा उद्यम, व्यवसाय गर्ने युवालाई राज्यले प्रोत्साहन गर्नुपर्ने धारणा राखे । ‘पछिल्लो समय होटल, रेस्टुराँमा लगानी बढेको छ,’ अध्यक्ष राजभण्डारीले भने, ‘व्यापारसँगै पर्यटन प्रवद्र्धनका लागि सुखद् पक्ष हो।’
व्यवसायसँगै गीत, संगीतमा पनि क्रियाशील रमेशले ‘माछी मारन’लगायतका गीतमा स्वर दिएका छन् । यहाँका पर्यटकीय गन्तव्यस्थललाई समेटेर उनले गाएको नयाँ गीत सार्वजनिक हुने तयारीमा छ ।रासस
