उत्तरी म्याग्दीको अन्नपूर्ण गाउँपालिका–३ दानामा बाढीपहिरो पीडितलाई दानावासीहरू आबद्ध फ्रेन्ड्ली ब्रदर्स दाना सेरोफेरो युकेले झन्डै १२ लाखभन्दा बढी आर्थिक सहयोग हस्तान्तरण गरेको छ ।

नेपालको लोक संस्कृतिको जगेर्ना तथा सामाजिक, मानवीय सेवामा सक्रिय रहेको इन्द्रेणी कार्यक्रम मार्फत दानाको फगाममा रहेका बाढीपहिरो पीडितलाई इन्द्रेणीका सञ्चालक कृष्ण कँडेल, सामाजिक अभियान्ता रमेश प्रसाईले हस्तान्तरण गर्नुभएको छ ।

बिहिबार इन्द्रेणीमार्फत गाउँपालिका उपाध्यक्ष केशमायाँ मगर र वडा अध्यक्ष नरसिंह बहादुर पूर्जा लगायतको उपस्थितीमा १२ लाख हस्तान्तरण गरिएको फ्रेन्ड्ली ब्रदर्स दाना सेरोफेरो युकेले जनाएको छ।

बाढीपहिरोले उठिबास लागेको फगाम गाउँका पीडितलाई यसअगाडी संस्थाका संस्थापक अध्यक्ष कमलबहादुर पूर्जामार्फत ५ लाखभन्दा बढी सहयोग गर्नुभएको थियो । सहयोग रकम स्थानीय बाढीपहिरो पीडितको क्षती अनुसार हस्तान्तरण गर्ने गरी समितिलाई दिइएको पर्यटन ब्यवसायी इन्द्रसिह शेरचनले बताउनुभयो ।

फगाम गाउँमा पूर्ण क्षती, आंशिक क्षती र सामान्य क्षती भएका सबैलाई उक्त सहयोग उपलब्ध गराइने दाना सेरोफेरो युकेका अध्यक्ष बलबहादुर पूर्जाले बताउनुभयो । ‘सबै पीडितलाई उक्त सहयोग उपलब्ध गराइने छ,‘बाढीपहिरोले धेरै क्षती पुगेकोमा दुखी छौ’ पूर्जाले भन्नुभयो ।

सहयोग हस्तान्तरण कार्यक्रममा प्रवासमा रहेका दानाबासीले गाउँको विकासमा खेलेको भूमिकाको उच्च प्रशंसा गरिएको थियो । फ्रेन्ड्ली ब्रदर्स दाना सेरोफेरो युकेमार्फत ज्ञानप्रकाश माविमा १ करोडको भवन, सोही विद्यालयमा १ करोड ५० लाखको अक्षय कोष, संस्थामा आवद्ध पदाधिकारीको विभिन्न अक्षयकोष लगायत गरी करोडौं सहयोग पुगेको छ ।