म्याग्दीको रघुगंगा गाउँपालिका-४ जनता मावि दग्नाममा अध्ययनरत विद्यार्थीले खाजा खर्च कटाएर दुर्घटनामा ज्यान गुमाएकी साथीको परिवारलाई सहयोग गरेका छन् । काठको मुढाले लागेर ज्यान गुमाएकी दर्मिजाकी १५ वर्षीया किशोरी दीक्षा गर्बुजाको सातौं पुन्यतिथिको अवसरमा विद्यालयका शिक्षक, विद्यार्थी सहितले परिवारलाई सहयोग रकम सहित समवेदान प्रकट गरेका हुन्।
कक्षा ९ म अध्ययनरत दीक्षाका साथीहरुको अगुवाईमा ९ हजार ४८५ रुपैयाँ संकलन गरिएको प्रधानाध्यापक गुन पुनले बताए । ‘विद्यार्थीको अभियानमा शिक्षकले पनि साथ दिनुभएको थियो,‘सहयोग रकम सानो भएपनि सन्देश ठूलो दिएको छ’ प्रअ पुनले भने । उनका अनुसार स्वर्गीय गर्बुजाको सम्झनामा विद्यालयमा पनि कार्यक्रम गरिएको थियो ।
आफ्नो घर नजिकै रहेको दर्मिजा खोलामा कपडा धोइरहेको बेला माथि जंगलमा काटेको काठको मुढा लडेर लाग्दा गर्बुजाको घटनास्थलमै मृत्यु भएको थियो । मुढा काट्नेको असावधानीकै कारण ज्यान गएको भन्दै प्रहरीले थप अनुसन्धान गरिरहेको छ ।
