कोरोनाको लक्षण देखिएपछि बेनी अस्पतालमा गएको बैशाख ३१ गते पिसिआरका लागि स्बाब दिएर होम क्वारेन्टाइनमा बसेका एक ब्यक्तिको स्बाबको रिर्पोट दुई सातापछि बुधबार आयो । स्बाब दिएर घर फर्किएपछि केही दिन श्वासप्रश्वासमा गाह्रो, शरीर दुख्ने, स्वाद हराएपनि विस्तारै स्वास्थ्यमा सुधार आएपछि नियमित काममा फर्किए ।
मास्क र सेनिटाइजरको प्रयोग गरी नियमित खेतबारीमा काम गर्ने गरेको अवस्थामा १३ दिनपछि रिर्पोट पोजेटिभ आएपछि पुनःहोम आइसोलेसनमा बसेका छन् । संक्रमति भएपनि अहिले उनीमा कुनै लक्षण छैन् ।
‘१३ दिनपछि नतिजा आयो,‘अब फेरी आइसोलेसनमा बस्नुपर्ने अवस्था देखियो’उनले भने । गएको जेठ १ गते स्बाब दिएका अर्का एक यूवा घरमै बसेपनि लामो समयसम्म नतिजा नआएपछि घरायसी काम गर्ने गरेका छन् । कुनैपनि लक्षण नभएको अवस्थामा कोरोनाको नतिजा पोजेटिभ आएको खवर जनप्रतिनिधिले जानकारी दिदै गर्दा उनी खेतबारीमा काम गरिरहेका थिए ।
बुधबार १ सय ५७ जनामा कोरोना संक्रमणको पुष्टि भएको थियो जसमा सबैभन्दा धेरै बेनी नगरपालिका भित्रका छन् । पिसिआर विधिबाट गरिएको परीक्षणमा कुल १ सय २१ जना र एन्टिजेनबाट ३२ जना रहेको स्वास्थ्य कार्यालयका सूचना अधिकृत गणेश सुबेदीले बताए । संक्रमतिमा बेनी नगरपालिका ९९, रघुगंगा गाउँपालिका ३४, अन्नपूर्ण गापाका ७, मंगला गापा ४ जना, धवलागिरी गापा ३, मालिका गापा २ जना छन् ।
सबै संक्रमति बैशाख ३१, जेठ १ र २ गते संकलन गरिएको स्बाब हो । ‘समयमै रिर्पोट नआउँदा समस्या हुन्छ,‘कोरोनाको रिर्पोटमै गोलमाल देखियो,‘गाउँबाट स्बाब संकलन गरिएकाको रिर्पोट समयमै आउनुप¥र्यो’ उनले भने। निको भइसकेको अवस्थामा स्बाबको नतिजा आउँदा समुदायस्तरमा थप त्रास फैलिने गरेको संक्रमितको गुनासो छ ।स्बाबको रिर्पोट समेत प्रयोगशालामै रोकिदाँ रिपोर्ट नआउँदासम्म शंकास्पद व्यक्ति गाउँमा घुम्ने, अरुसँग घुलमिल हुने गरेको पाइएको छ ।
कोरोना लक्षण देखिएपछि पिसिआर जाँच गर्न दिएको स्वाबको रिपोर्ट ढिलो आउँदा समुदायमा संक्रमण बढेको छ। जिल्लामा पिसिआरका लागि स्बाब दिइएकोमा १ महिलाको मृत्युपछि मात्रै नतिजा आएको थियो ।
जिल्ला कोभिड–१९ संकट व्यवस्थापन केन्द्र (डिसीसीएमसी)को बैठकले जिल्लाभित्र लागु हुने गरी जेठ १७ गतेसम्मलाई निधेषधाज्ञालाई लम्बाइएको छ । कोरोनाको चेन ब्रेक गर्न (सर्ने प्रक्रिया रोक्न) थपिएपनि कोरोनाका संक्रमतिको संख्या उकालो लागिरहेको छ ।
निधेषधाज्ञामा ध्यान केन्द्रित गरेपनि स्बाब संकलन र परीक्षणमा भने झन्झटिलो विधिमै स्थनीय तह अल्झिएका छन् । पछिल्लो एक साता यताको तथ्याङ्क हेर्दा लिइएको स्याम्पलमा कतै ७० प्रतिशतसम्म पोजेटिभ आएको छ। सामान्य अवस्थामा गाउँमा ४० प्रतिशत पोजेटिभ देखिनु भनेको गाउँभित्र पनि संक्रमण फैलिएको छ भन्ने पुष्टि हो ।
मानिसहरूको आवतजावत कम हुने गाउँहरूमा पनि ३० देखि ४० प्रतिशतमा संक्रमण देखिनु भनेको भयावह अवस्था भएको स्वास्थ्य कार्यालयका निमित्त प्रमुख एकनारायण लम्सालले बताए । उनले आधा घण्टामै रिर्पोट आउने एन्टिजेन परीक्षणमा स्थानीय तहले प्राथमिकता दिएमा रिर्पोट ढिलो आउने समस्या समाधान हुने बताए ।
एन्टिजेन विधिको रिर्पोट समेत पिसिआर सरह हुने भएकाले तत्काललाई प्रत्येक स्थानीय तहलाई आवश्यक पर्ने किट उपलब्ध समेत गराइएको छ । कोरोना नियन्त्रणका लागि जोखिम मानिएका क्षेत्रमा स्क्रिनिङ र एन्टिजेन परीक्षणको दायरा बढाउन समेत स्वास्थ्यका जानकारहरुको भनाई छ । म्याग्दीमा संक्रमितको संख्या १७७२ जना पुगेको छ ।
जसमा पिसिआरबाट १३ सय ८६ जना र एन्टिजेनबाट ३ सय ८६ रहेका छन् । जिल्लामा ५५० जना सक्रिय संक्रमित छन् । अझै १ सय ६४ वटा नमुनाको रिपोर्ट आउन बाकी रहेको छ। कोरोनाको लक्षण देखिएपछि स्बाब संकलन गरी पोखरा र बागलुङ पठाउने गरिएपनि लामो समयसम्म नतिजा नआउँदा लक्षण देखिएकाहरु समेत चिन्तित हुने गरेका छन्।
