म्याग्दीको अन्नपूर्ण गाउँपालिका-२ भुरुङ्ग–तातोपानीका वडा अध्यक्ष ओम फगामी नेकपा माओवादी केन्द्रमा खुल्नुभएको छ। फगामी मुल पार्टीमै फर्किएको सामाजिक सञ्जालमा लेख्नुभएको छ ।
सर्वोच्च अदालतले मान्यता नदिएर पुर्ववत पार्टी यथावत भएपछि स्थानीय तह निर्वाचनमा माओवादीबाट निर्वाचित फगामी तटस्थ देखिनुभएको थियो । तत्कालीन नेकपामा बिवाद देखिएपछि तटस्थ रहदै आएका फगामीले निर्वाचित पार्टीकै सदस्यता नबिकरण गरेर राजनीतिमा सक्रीय हुने निर्णय गरेको बताउनुभयो ।
बि.स. २०७४ असोजमा एमाले र माओवादी केन्द्र एकता हुनुअघी भुरुङ तातोपानीका पाँचै जना माओवादीका जनप्रतिनिधी एमालेमा प्रवेश गरेका थिए । वडा सदस्य वुद्धी पुन र बिरबहादुर पौडेल यसअघिनै माओवादी केन्द्रमा देखिनुभएको थियो । फगामीसँगै तटस्थ देखिएका कार्यपालिका सदस्य बिष्णुकुमारी दमै र टेकमाया तिलिजा पनि माओवादी केन्द्रमै खुल्नुभएको छ ।
पुनलाई माओवादी केन्द्रले अन्नपूर्ण गाउँपालिकाको इञ्चार्जको जिम्मेवारी दिएको छ । उत्तरी म्याग्दीको राजनीतिमा सम्भावना देखिएका फगामी र पुन नेकपा कायम रहँदा एमालेको कोटाबाट जिल्ला कमिटि सदस्य बन्नुभएको थियो ।
अन्नपूर्णमा माओवादीको खम्बा मानिएकाले नै एमालेलाई रोज्दा कमजोर देखिएकोमा फर्किएपछि माओवादीले कांग्रेस, एमालेलाई टक्कर दिने विश्लेषण समेत गरिएको छ । अन्नपूर्णमा माओवादी सबैभन्दा बलियो भुरुङ तातोपानीमै रहेको छ ।
मुल पार्टीमा खुल्ने नेता, कार्यकर्ताहरुको निर्णयको स्वागत गर्दै उहाँहरुलाई उचित जिम्मेवारी दिइने नेकपा माओवादी केन्द्र म्याग्दीका अध्यक्ष गोबिन्द पौडेलले बताउनुभयो ।
फगामी लगायत भरुङ्ग तातोपानीका जनप्रतिनिधि र कार्यकर्ताहरुलाई आफ्नो पक्षमा खुलाउन माओवादीका जिल्ला र प्रदेश तहका नेताहरुले विभिन्न चरणमा पहल गरेका थिए । माओवादीले जिल्लाका सबै स्थानीय तहमा आफ्नो पुरानो कमिटीलाई सक्रिय बनाउन थालेको छ । सबै स्थानीय तहको वडास्तरमै पुगेर माओवादीले आफ्नो शक्तीलाई पुरानै अवस्थामा फर्काउन तल्लीन रहेको जनाइएको छ ।
