ब्रह्माकुमारी ईश्वरीय विश्व विद्यालय बेनी म्याग्दीले कार्तिक २५ गते बिहीबारदेखि २९ गते सोमबारसम्म पाँच दिवसीय श्रीमद् भगवद् गीता ज्ञान महायज्ञ, व्यवहारिक एवं वैज्ञानिक प्रवचन कार्यक्रमको आयोजना गर्ने भएको छ । विगत साढे डढे दशक यता म्याग्दीमा ईश्वरीय ज्ञान प्रदान गदैं आएको ओम शान्तिले जिल्ला समन्वय समितिको सभाहलमा उक्त महायज्ञको तयारी गरेको बेनी शाखा प्रमुख रिना दिदीले बताउनुभयो । ‘गतबर्ष कोरोनाका कारण स्थगित भयो,‘अहिले हामीले सम्पूर्ण तयारी पुरा गरेका छौ’ प्रमुख रिनाले भन्नुभयो ।
उहाँका अनुसार जिल्लाका सबै स्थानीय तह, संघसंस्थालाई समेत सहभागीताका लागि अनुरोध गरिएको छ । धर्मग्लानिको वर्तमान समयमा अधर्मको विनाश र सत्य सनातन देवी देवता धर्मको स्थापनार्थ ज्योतिस्वरुप परमपिता परमात्माले सम्पूर्ण मानव आत्माहरुको मनरुपी कुरुक्षेत्रमा चलिरहेको द्वन्द्धको समाधान गरी पवित्रता, सुख, शान्ति र आनन्द प्राप्तिका लागि दिनुभएको सत्य ज्ञान नै वास्तवमा श्रीमद्भगवद् गीता ज्ञान भएको उहाँको भनाई छ । वर्तमान समयमा हरेकको व्यक्तिगत (मानसिक), पारिवारिक एवं व्यवसायिक जीवनमा आइपर्ने सर्वसमस्याहरुको समाधानमा महायज्ञमार्फत ज्ञान प्रदान गरिने जनाइएको छ ।
प्रवचनको प्रमुख वक्ताको रुपमा पोखराबाट राजयोगिनी अप्सरा दिदीको मुख्य प्रस्तुति रहनेछ । विगत २५ वर्षदेखि ईश्वरीय सेवामा समर्पित तथा श्रीमद्भगवद् गीता, तनाव व्यवस्थापन, राजयोग मेडिटेशन लगायतका विषयहरुको विशेषज्ञ हुनुहुन्छ । उहाँले भारतको अन्नमलाई विश्वविद्यालयबाट मूल्य शिक्षा एवं आध्यात्मिकतामा स्नातकोत्तर (एमएस्सी) समेत गर्नुभएको छ । संस्थाको निःशुल्क, निश्वार्थ एवं निष्काम सेवाको रुपमा सञ्चालित यस कार्यक्रमको सफलताको लागि आयोजकले सबैमा अपिल गरेको छ ।
