बुधबार पर्वतमा भएको सवारी दुर्घटनामा घाईते भएकाहरुको उपचारमा यातायात व्यवसायी र सम्बन्धित सवारी धनीले व्यवास्ता गरे पनि अक्षेतेमा चक्का जाम गरिएको छ । बुधबार बागलुङबाट पोखरा जाँदै गरेको ग १ ज ७२५६ नम्बरको टाटा सुमो पोखराबाट कुश्माका लागि छुटेको ग १ ख ५२१८ नम्बरको बससंग ठोक्किदा घाईते भएकाहरुको उपचारमा वेवास्ता गरिएको भन्दै काठेखोलाका स्थानीयले अक्षेतेमा चक्का जाम गरेका हुन् ।
दुर्घटनामा रेशका ३१ वर्षीय सवारी चालक लालबहादुर थापाको घटनास्थलमै मृत्यु भएको थियो । दुर्घटनामा अन्य १३ जना घाईते भएका थिए । उनीहरुलाई उपचारका लागि पोखरा लगिए पनि घाईतेहरुको उपचारका लागि यातायात व्यवसायी र सम्बन्धित सवारी धनीले कुनै चासो नदेखाउने र सम्पर्कमै नआउने गरेपछि बाध्य भएर चक्का जाम गर्नु परेको तंग्रामका विष्णु आलेले बताए ।
दुर्घटना घाईतेहरुको बेहाल छ, सवारी धनी यातायात व्यवसायीहरु कोही सम्पर्कमै आएका छैनन्,’ उनले भने,‘उपचारमा वेवास्ता भएका कारण घाईतेहरुको ज्यान जोखिममा परेपछि बाध्य भएर चक्का जाम गरेका छौं । घाईतेहरुको उपचारको सही व्यवस्था नहुँदासम्म चक्काजाम रहन्छ ।’ बिहीबार साँझबाट चक्काजाम गरिएको हो ।
चक्का जामपछि पश्चिम बागलुङतर्फ जाने सवारी साधनहरु अक्षेतेमै थुप्रिएका छन् । सवारी दुर्घटनामा घाईते भएकी तंग्रामकी २३ वर्षीया प्रतीक्षा पुनको पनि मृत्यु भएको छ । कुशुम पुन लगायतको पोखरामा उपचार भैरहेको छ । घाईतेहरुको उपचारमा बेवास्ता गरिएको र यातायात व्यवसायीहरु कोही पनि सम्पर्कमा नआएको तंग्रामका निवर्तमान वडाध्यक्ष केशव थापाले बताए ।
