अन्नपूर्ण गाउँपालिका–६ घारमा निर्माणाधीन १४ मेगावाट क्षमताको घारखोला जलविद्युत् आयोजना निर्माण अन्तिम चरणमा पुगेको छ । ०७४ चैतदेखि निर्माणाधीन आयोजनाले ९२ प्रतिशत निर्माण सकेको र आगामी मंसिरदेखि परीक्षण उत्पादन थाल्ने लक्ष्यसहित काम भइरहेको प्रवर्द्धक कम्पनी म्याग्दी हाइड्रोपावर लिमिटेडले जनाएको छ ।
म्याग्दीको अन्नपूर्ण गाउँपालिका–६ घारको घारखोलामा निर्माणाधीन १४ मेगावाट क्षमताको घारखोला जलविद्युत् बाँध र डिसेन्टरमा पानी हालेर परीक्षण भइरहेको आयोजनाका मुख्य इन्जिनियर जोसेफ बज्राचार्यले बताए । तीन मिटर डायग्रामको सुरुङ प्लास्टर गर्ने काम सकेर तिहारपछि सुरुङको परीक्षण गरिने उनको भनाइ छ ।
अमिलाकाफलको आउटलेटबाट १२ सय मिटर पेनस्टक पाइपलाई ४ सय ८५ मिटर हेडबाट बेनी–जोमसोम सडकको पोखरेबगरमा रहेको विद्युत् गृहमा जोडिसकिएको छ । टर्बाइन, जेनेरेटरलगायत इलेक्टोमेकानिकलतर्फका उपकरण जोड्ने काम सुरु भएको छ । पोखरेबगरदेखि २२० केभीए दाना सबस्टेसनसम्म ८ किमि ३३ केभीए डबल सर्किट प्रसारण लाइनको पोल गाड्ने, तार टाँग्नेलगायत सबस्टेसनमा सिभिल संरचनाको काम भइरहेको बज्राचार्यले जनाए ।
२ अर्ब ४२ करोड लागत अनुमान गरिएको आयोजना निर्माण ०७८ माघमा सक्ने लक्ष्य थियो । तर कोरोना, निषेधाज्ञा, बन्दाबन्दी, प्राकृतिक विपद्समेतका कारणले करिब एक वर्ष ढिलाइ भएको आयोजनाले जनाएको छ । ‘थ्रीसी’ मोडलमा निर्माण भइरहेको घारखोला जलविद्युत् प्राधिकरणको सिभिल इन्जिनियर साउथ एसियन इन्फ्रास्ट्रक्चर प्रालि, इलेक्ट्रो मेकालिकलमा सिमर इनर्जी प्रालि भारत, हाइड्रो मेकालिकलमा सीई हाइड्रो मेकानिकल प्रालि, ट्रान्समिसनको काम रोयल कन्स्ट्रक्सन प्रालि र परामर्शदाताका रूपमा हाइड्रो कन्सल्ट इन्जिनियरिङ लिमिटेड छन् । यो समाचार इकान्तिपुर डटकमका लागि घनश्याम खड्काले लेखेका छन् ।
