आसन्न प्रतिनिधि सभा तथा प्रदेशसभा सदस्य निर्वाचनमा मतदातालाई प्रभावित बनाउन नगद बाँडेको भन्दै गठवन्धनका उम्मेदवारहरु विरुद्ध उजुरी परेको छ । प्रतिनिधिसभा सदस्यका उम्मेदवार खम्विर गर्वुजा, प्रदेश (क) का उम्मेदवार हरि भण्डारी र प्रदेश (ख) का उम्मेदवार रेशम जुग्जाली सुविन विरुद्ध मतदाता प्रभावित बनाउन रकम बाँडेको भन्दै उजुरी परेको मुख्य निर्वाचन अधिकृतको कार्यालयले जनाएको छ ।
उम्मेदवार गर्वुजाले मालिका गाउँपालिका स्थित सृजनशिल युवा क्लवलाई चुनाव चिन्ह अंकित नेपाली काँग्रेसको टिर्सट बाँडेको उजुरीमा उल्लेख गरिएको छ। त्यस्तै गठवन्धनकै प्रदेश (क) का उम्मेदवार हरि भण्डारीले बेनी नगरपालिका ६ को छाप युवा क्लवलाई रु १० हजार दिएको र प्रदेशसभा (ख) का उम्मेदवार रेशम जुग्जाली सुविनले मालिका ७ ढुनोटको साईनिङ युवा क्लवलाई रु ७ हजार नगद बाँडेको उजुरीमा उल्लेख गरिएको छ ।
बेनी नगरपालिकाका लक्ष्मीनिधी रिजालले गठबन्धनका उम्मेदवार विरुद्ध मुख्य निर्वाचन अधिकृतको कार्यालयमा मंगलबार उजुरी दर्ता गराउनुभएको हो । काँग्रेसका प्रतिनिधिसभा सदस्य उम्मेदवार खम्विर गर्वुजा, माओवादीका प्रदेश (क) का उम्मेदवार हरि भण्डारी र प्रदेश (ख) का उम्मेदवार रेशम जुग्जाली विरुद्ध निर्वाचन आचारसंहिता विपरित गतिविधि गरेको भन्दै उजुरी परेको छ, आचारसंहिता अनुगमन समितिका अध्यक्ष रामभक्त रानाभाटले भन्नुभयो, “आजै अनुगमन समितिको वैठक बसेर उजुरी उपर छलफल गर्छौँ” ।
यसअघि निर्वाचन आचारसंहिता विपरित गतिविधि गरेको भन्दै नेकपा एमोलका उम्मेदवार विरुद्ध पनि उजुरी दर्ता भएको थियो । उजुरी पश्चात मुख्य निर्वाचन अधिकृतको कार्यालयले एमाले उम्मेदवारहरुलाई स्पष्टिकरण माग गरेको थियो । उजुरीको विषयमा नेकपा एमालेबाट प्रतिनिधिसभा सदस्य उम्मेदवार हरिकृष्ण श्रेष्ठ र प्रदेशसभा ख का उम्मेदवार याम बहादुर गर्वुजाले लिखित रुपमा स्पष्टिकरण मुख्य निर्वाचन अधिकृतको कार्यालयमा बुझाउनुभएको छ ।
यता गठबन्धनका प्रदेशसभा क्षेत्र नं क का उम्मेदवार हरि भण्डारीले उजुरीमा उल्लेख गरिएको स्थानमा कुनैपनि चन्दा नदिएको बताउँदै विपक्षीले आफ्नो कमजोरीलाई लुकाउन अनावश्यक आरोप लगाएको बताउनुभयो । उहाँले पैसा र जिन्सी सामान दिएर मतदाताको अपमान गर्नेहरुबाट भइरहेको अनावश्यक प्रचारप्रसार भएको बताउनुभयो ।
