काठमाण्डौको टिचिङ अस्पतालको बाल कक्षको बेड नं ८७९ मा ९ महिने शिशु आरभ सिर्पाली आमाको काखमा छटपटाइरहेका छन् । जन्मिएको केहीदिनमा अस्वभाविक रुपमा टाउको फुलेपछि मनदेवी घर्ती सुनार छोराको उपचारका लागि अस्पतालमा छिन् ।
गएको जेठ २० गते र कात्तिक २० गते गरी दुईपटक टाउकोको शल्यक्रिया गरिएपनि निको नभएपछि चिकित्सकको सल्लाह अनुसार तेस्रो शल्यक्रियाका लागि अस्पतालमा पुगेकी म्याग्दी धवलागिरी गाउँपालिका वडा नं ४ मुदीको खिवाङकी मनदेवीसँग छोराको उपचारमा आवश्यक पर्ने आर्थिक छैन् ।
असह्य पीडाले काखमा रुँद छटपटाइरहेको छोराको उपचारमा जुटाएको आर्थिक सकिएपछि मनदेवी भक्कानिएकी छन् ।छोराको उपचारलाई केही सहज बनाउन र घरखर्च चलाउन भन्दै तीन महिना अगाडी मलेसिया गएका श्रीमान राम सुनारले समेत खर्च पठाउन सकेका छैनन् ।
शिशुलाई चिकित्सकले सिफारिस गरेको पोषण लगायतको खानेकुरा समेत खुवाउन समस्या भइरहेको छ । छोराको उपचारका लागि मात्रै नभई सामान्य खर्च गर्ने पैसाको जोहो गर्न नसक्ने अवस्था भएपछि मनदेवीले अस्पतालको शैयाबाटै सहयोगको याचना गरेकी छन् ।‘छोराको अर्को अप्रेशनका लागि पैसा छैन्,‘अहिले थोरैथोरै सहयोग जुटेको छ, अझै धेरै खर्च लाग्छ’ मनदेवीले भनिन् । उनले विगतमा गरिएको अप्रेसन सहित नियमित औषधी सेवनमा धेरै खर्च भएकाले अव आर्थिक संकलन नगरी उपचार सम्भव नभएको बताईन् ।
चिकित्सकले अप्रेसन सहित नियमित औषधी सेवन लगायत आवश्यक खर्च जुटाएपछि सहज उपचार हुने बताएको उनले बताईन् । ‘सहयोग गरी मेरो छोरा बचाइदिनुहोस्,‘हामीसँग भएको सबै पैसा सकियो’ मनदेवीले भनिन् । उनले विगतमा सहयोग र ऋण संकलन गरी उपचार गरेको बताईन् । यसैबीच शिशुको थप उपचारका लागि आर्थिक संकलन अभियान समेत सुरु गरिएको आशिष परियारले बताए । उनका अनुसार आर्थिक सहयोगसँगै काठमाण्डौमा भएकालाई अस्पतालमा पुगेर समेत सहयोग गर्न अपिल गरेका छन् ।
थप जानकारी-: मनदेवी सिर्पाली-9866003909
