म्याग्दी मंगला गाउँपालिका–१,भर्जुलामा अवस्थित बालोदय आधारभूत विद्यालयलाई बेलायती सेनामा कार्यरत पूर्व विद्यार्थीले आर्थिक तथा खेलकुद साम्रागी सहयोग गर्नुभएको छ ।
४६ औं जन्मोत्सव तथा अभिभावक दिवसको अवसरमा ब्रिटिस आर्मी जगप्रसाद जुग्जाली र धर्मपत्नी सोनीका जुग्जालीले १ लाख ७० हजार र खेलकुद सामग्री सहयोग गरेको विद्यालयका शिक्षक मनकुमार जुग्जालीले जानकारी दिनुभयो । उहाँका अनुसार जुग्जालीको परिवारको विद्यालयमा अतुलनीय योगदान रहेको छ।
विद्यालयका निर्बतमान विब्यस अध्यक्ष गमबहादुर जुग्जालीका छोरा समेत रहनुभएका सहयोगदाता जगप्रसादले आफूँले पढेको विद्यालयलाई सहयोग गर्न पाउँदा अत्यन्त हर्षित भएको र आगमी दिनमा पनि विद्यालयको चौतर्फी विकासका लागि सक्दो सहयोग गर्ने बताउनुभएको थियो ।
कार्यक्रममा प्रधानाध्यापक झलकनाथ उपाध्यायले विद्यालयलाई सहयोग गर्ने चन्दादाताहरुप्रति हार्दिक कृतज्ञता ज्ञापन गर्दै शैक्षिक विकासका लागि निरन्तर साथ सहयोगको आवश्यकता रहेको बताउनुभएको थियो ।
विद्यालयको विव्यस.अध्यक्ष यामबहादुर रोकाको अध्यक्षता, सहयोगदाता जगप्रसाद जुग्जालीको प्रमुख आतिथ्यता, समाजसेवी यामकुमारी पुनको विशिष्ट आतिथ्यतामा, शिक्षक गणेश सुवेदीको स्वागत मन्तव्य तथा शिक्षक मनकुमार जुग्जालीको संचालनमा कार्यक्रम सम्पन्न भएको थियो ।
