छोटो र पारिवारीक जलयात्राका लागि ‘फेमिली रिभर’को रुपमा चिनीएको कालीगण्डकी नदीको म्याग्दी खण्डमा नियमित जलयात्रा (र्याफ्टिङ) सञ्चालन सुरू भएको छ ।
प्रसस्तै सम्भावना भएपनि नियमित सञ्चालन हुन नसकेको अवस्थामा बेनी नगरपालिका–८, कालीपुलमा हालै सञ्चालनमा आएको कालीगण्डकी होटलका सञ्चालक गमबहादुर पुनले स्पाइसी र्याफ्टिङ प्रालिसँगको सहकार्यमा बेनीबाट नियमित सञ्चालन गर्ने गरी मंगलबारदेखि छोटो र लामो दुरीको कायाकिङ्ग, र्याफ्टिङका लागि परिक्षण गरिएको छ।
म्याग्दी र मुस्ताङका विभिन्न पर्यटकीयस्थलका घुम्न आउने आन्तरिक तथा बाह्य पर्यटकलाई लक्षित गरी नियमित सञ्चालन गरिने होटल ब्यवसायी गमबहादुर पुनले बताए। अब नियमित र्याफ्टिङको सुविधा छ,‘तीनवटा प्याकेजमा सञ्चालन गरिने छ’ पुनल भने ।उनका अनुसार करिब ३ किलोमिटरमा खानाको सुविधा सहित प्रति ब्यक्ति १२ सय रुपैयाँबाट सुरु गरिएको बताए ।
प्रसिद्ध धार्मिकस्थल गलेश्वरबाट म्याग्दी र कालिगण्डकीको संगमस्थलसम्म छोटो दुरी तथा गलेश्वर–मालढुंगासम्मको दुरीमा म्याग्दी, बागलुङ र पर्वतबाट समेत विदा सहित अन्य समयमा जलयात्राका लागि आर्कषित गर्न सकिने बताए ।
गलेश्वरदेखि मिमीसम्मको तीनवटा प्याकेट तयार गरिएको छ। यस अगाडी दुरीको अध्ययन तथा अवस्थाका बारेमा भिडियो सहितको विवरण संकलन समेत गरिएको थियो । जलयात्रामा प्रख्यात कालिगण्डकीमा विदेशी पर्यटकको तुलनामा आन्तरिकको समेत आर्कषण ह्वात्तै बढेको छ ।
आगामी पुस २८ देखि माघ ७ गतेसम्म म्याग्दीको सदरमुकाम बेनीमा हुने सातौ म्याग्दी महोत्सवको प्रमुख आर्कषकमध्ये जलयात्रालाई समेत राखिएको छ म्याग्दी उद्योग वाणिज्य संघको आयोजनामा माघे संक्रान्ति पर्वको अवसरमा महोत्सवका साथै गण्डकी प्रदेशस्तरीय कृषि, पर्यटन, औद्योगिक, व्यापार मेलामा अत्याधिक चाप हुने गरी प्रचारप्रसार भइरहेको संघका अध्यक्ष बेलबहादुर कटुवालले बताए ।
‘अब जलयात्रालाई नियमित सञ्चालन गर्ने गरी प्रोत्साहन गछौं, जलको सदुपयोग गरी पर्यटक भित्राउन सकिन्छ’ अध्यक्ष कटुवालले भने ।उनले विश्वकै दुर्लभ मानिएको शालिग्राम शिला पाइने कालिगण्डकीको महिमाको प्रचारप्रसारमा समेत सघाउने बताए । कालिगण्डकी नदीमा दोहनका कारण धार परिवर्तन भएकाले केही असहज भएको ब्यवसायीको भनाई छ।
लामो, समथर र कम बहाब भएकाले पनि कालिगण्डकीका जलयात्रा गर्ने गरिन्छ । एक पटक १० जनासम्म चढ्न मिल्छ । कालीगण्डकी नदीमा पानीको छाल, मनोरम दृश्य, झरना, विभिन्न बनस्पति, जलचरहरुको अवलोकन, प्रदूषणरहित हावापानीबाट पर्यटकहरु आर्कषित हुने गरेका छन्। गलेश्वर बेनी ३ किलोमिटर र बेनीदेखि मालढुङ्गासम्म करिव १२ किलोमिटर जलयात्रालाई विगतमा समेत प्रयास गरिएपनि म्याग्दी खण्डमा ब्यवसायी आर्कषित हुन सकेका थिएनन् ।
पर्वतको जलजला गाउँपालिकाको नाईलिवाङदेखि पानीको सतह घटेसँगै तीन दिने लामो जलयात्रा मालढुंगा हुदैस्याङजा, पर्वत र गुल्मी जिल्लाको सिमानामा रहेको कालीगण्डकी ‘ए’ जलविद्युत् परियाजनाको जलाशय सबैभन्दा लामो यात्रा मानिन्छ ।
