विश्वकै सबैभन्दा ठूलो सामाजिक एवम् मानवीय सेवामा सक्रिय लायन्स क्लवले म्याग्दीको मालिका गाउँपालिका-६,स्थित दरबाङ प्राथमिक स्वास्थ्य केन्द्रलाई ५३ लाखभन्दा बढी मुल्य पर्ने उपकरण सहयोग गरेको छ। लायन्स क्लब अन्तर्राष्ट्रिय डिट्रीक्ट ३२५ आईष्ट समन्वय र लायन्स क्लब अफ इन्टरनेशनल फाउन्डेसनले लायन्स क्लव अफ म्याग्दी दरबाङको सिफारिसमा उपकरण खरिद गरेर उपलब्ध गराएको हो ।
नेपालमै अत्याधुनिक मानिएको करिब ४२ लाख मुल्ल बराबरको ५०० एमए एक्सरे, कम्प्युटर रेडियोग्राफी सिस्टम एक थान, युएसजी र इलेक्ट्रोटोटल एनालाइजर मेसिन उपलब्ध गराइएको लायन्स क्लब अन्तर्राष्ट्रिय डिट्रीक्ट ३२५ आईष्टका प्रथम भाईस डिस्ट्रीक्ट गभर्नर चन्द्रकुमार केसीले बताउनुभयो । ‘पश्चिम म्याग्दीका बिरामीलाई अव बाहिर जानुपदैन्, नेपालमा कमै प्रयोग भएको एक्सरे मेसिन प्रयोग गरिएको छ’ प्रथम भाईस डिस्ट्रीक्ट गभर्नर केसीले भन्नुभयो ।
दरबाङमा जडान गरिएको उपकरणको प्रदेशसभा क्षेत्र नं २ का सांसद रेशमबहादुर जुग्जालीले उद्घाटन गर्नुभएको थियो ।पश्चिम म्याग्दीको मंगला, मालिका र धवलागिरी गाउँपालिका सहित छिमेकी बागलुङको तामान गाउँपालिकाबाट समेत सेवा लिने केन्द्रमा पछिल्लो समय थपिएको उपकरण सहितका जनशक्तीले बिरामीलाई सहज भएको छ ।
उपकरण हस्तान्तरण कार्यक्रममा मालिका गाउँपालिकाका अध्यक्ष बेगप्रसाद गर्बुजा, लायन्स क्लवका एरिया कोअर्डीनेटर राजन लम्साल, लिमिडाइट पास्ट मल्टीपल काउन्सील अध्यक्ष मनबहादुर रोका र डिस्ट्रिक गर्भनर राम बसेल लगायतको उपस्थिती रहेको थियो । लायन्स क्लवमार्फत म्याग्दीमा शिक्षा, स्वास्थ्य लगायतको सामाजिक कार्यमा कराडौं लगानी भएको छ । लायन्स क्लवले अवका दिनमा प्रत्यक्ष बर्ष म्याग्दीमा कम्तिमा १ करोडको प्रोजेक्ट गर्न सक्ने जनाइएको छ ।
