म्याग्दी उद्योग वाणिज्य संघले सातौं म्याग्दी महोत्सव एवं माघे संक्रान्ति मेला तथा प्रदेशस्तरीय कृषि, पर्यटन, औधोगि, ब्यापार मेलाबाट ८७ लाखभन्दा बढी आम्दानी भएको छ । गत बर्ष पुष २० गतेदेखि माघ ७ गतेसम्म सदरमुकाम बेनीमा संचालन भएको सातौं म्याग्दी महोत्सवमा ८६ लाख ९८ हजार ५४ रुपैयाँ आम्दानी भएको म्याग्दी उद्योग वाणिज्य संघका अध्यक्ष बेलबहादुर कटुवालले बताए । कुल आम्दानीमध्ये ७० लाख ६९ हजार ८५४ रुपैयाँ महोत्सव संचालनमा खर्च भएको अध्यक्ष कटुवालको भनाई छ ।
पत्रकार सम्मेलनमार्फत सार्वजनिक गरिएको आयब्ययमा आम्दानीबाट भएको बचतमध्येको १० लाख रुपैयाँ ब्यावसायीक हित कोषमा जम्मा गरिएको छ भने पत्रकार महासंघ, नेपाल बालसंगठन, कालीपुल बसपार्क ब्यवस्थापन र नविन योग केन्द्रलाई प्रतिसंस्था ३५ हजार रुपैयाँ दरले सहयोग उपलब्ध गराईएको छ। संस्थामा आवद्ध रहेकालाई हितकोषमार्फत सहयोगका लागि अहिलेसम्म हितेकाषमा ४३ लाख रुपैयाँ संकलन भएको छ ।
बि.स २०५८ सालदेखि सुरु भएको महोत्सवले म्याग्दीको जातजातीको भेषभुषा पहिचान र जिल्लाको पर्यटन प्रवद्र्धनको सुरुवात समेत भएको महोत्सवले आन्तरिक पर्यटन र ब्यापारमा सघाइरहेको छ । सोही अवसरमा संघका पुर्व अध्यक्ष कुविर कुमार श्रेष्ठ,निर्वतमान अध्यक्ष एवम् बेनी नगरपालिका वडानम्वर ८ का वडाअध्यक्ष उत्तम कर्माचार्यले पर्यटनको सम्भावना उजागर भएको क्षेत्रमा लगानीको अभावले पर्यटन प्रवद्र्दन हुन नसकेको बताएका थिए ।
संघका अध्यक्ष कटुवालले प्रायोजकले समयममै उपलब्ध नगराएकाले खर्च विवरण सार्वजनिकमा ढिलाई भएको बताए । कार्यक्रममा बरिष्ठ उपाध्यक्ष सुविन श्रेष्ठ, उपाध्यक्ष लिलाराम गौतम र महासचिव अमृत बानियाँ, नेपाल पत्रकार महासंघ म्याग्दीका अध्यक्ष प्रकाश पौडेल लगायत पत्रकारहरुको उपस्थित थियो ।
