जयन्ती माविलाई अमेरिकाबाट थप साढे सात लाखभन्दा बढी सहयोग

म्याग्दीको बेनी नगरपालिका-३,भकिम्लीस्थित जयन्ती माध्यमिक विद्यालयलाई अमेरिकामा रहेका भकिम्लीबासीले थप आर्थिक सहयोग गरेका छन् । नवनिर्मित २२ कोठे भवन निर्माणमा अमेरिकाबाट शैक्षिक र पूर्वाधारमा खर्च गर्ने गरी थप ७ लाख ८७ हजार ११६ सहयोग गरेका हुन् ।

२०७२ सालदेखि विद्यालयको पुनर्निर्माणको अभियान सुरु गरिएको भवन निर्माणको अभियानको पहिलो चरणमा १२ लाख २ हजार २२२ र दोस्रो चरणमा ८ लाख ५४ हजार ४४२ रुपैयाँ सहयोग गरिएकोको थियो । तिनवटै चरणमा गरी कुल २८ लाख ४३ हजार ७८० रुपैयाँ विद्यालयलाई उपलब्ध गराइएको अमेरिकामा आर्थिक संकलन गर्ने एक अभियान्ता उाम पुनले बताए।

‘विद्यालयको भवन अभियानमा यो अन्तिम सहयोग हो, आर्थिक सहयोग गर्ने सम्पूर्ण सहयोगदातालाई धन्यवाद ज्ञापन गर्दछौ’ अभियान्ता पुनले भने । उनले अमेरिकामा रहेका भकिम्लीबासीको अगुवाईमा संकलन भएको आर्थिकले भवन बनाउने अभियानमा साथ पुगेको बताए ।

विद्यालयको भवन निर्माण तथा उद्घाटन सँगै अव शैक्षिक गुणस्तर बृद्धिमा ध्यान केन्द्रित गर्नुपर्ने बताए । भौतिक पूर्वाधारमा अब्बल भएको जयन्ती माविलाई अब शैक्षिक गुणस्तरमा समेत जिल्लाको अब्बल विद्यालय बनाउनुपर्नेमा सहयोगदाताको समेत जोड रहेको छ । भवनको गण्डकी प्रदेशका भौतिक पूर्वाधार विकास तथा यातायात व्यवस्था मन्त्री रेशमबहादुर जुग्जालीले उद्घाटन गरेका थिए ।

विद्यालयमा नवनिर्मित भवनसँगै प्रवेशद्वार, खेलमैदान र प्याराफिट निर्माणसहित घेराबार समेत गरिएको छ । छरिएर रहेका स–साना कक्षाकोठा रहेको र जिर्ण बन्दै गएको साविकको जयन्ती माविको अहिले भौतिकस्वरुप फेरिएको अवस्थामा अब प्रवासी भकिम्लीबासीले समेत शैक्षिक क्षेत्रमा केन्द्रित हुने गरी अल्पकालिन, मध्य र दिर्घकालिन शैक्षिक क्यालेन्डर बनाएर जानुपर्नेमा जोड दिएका छन् । भवनका लागि संकलन गरिएपनि हस्तान्तरण नभएका केही देशबाट समेत सहयोग प्राप्त हुन बाँकी रहेको विद्यालयका प्रअ भोज जिसीले बताए ।