उत्तरी म्याग्दीको अन्नपूर्ण गाउँपालिका–४ नारच्याङको निर्माणधिन अवस्थामा रहेको निलगिरी हाईड्रोपावरको ७१ मेगावाट क्षमताको निलगिरी क्यासकेडमा एक मजदुरको दुर्घटनामा ज्यान गएको छ ।
बुधबार दिउँसो साढे २ बजे अडिट नं २ को काम गरिरहेको अवस्थामा दाङ जिल्ला घर भएका डोण बहादुर बुढामगरको सुरुङभित्र चिप्लिएर लड्दा घटनास्थलमै मृत्यु भएको जिल्ला प्रहरी कार्यालय म्याग्दीले जनाएको छ ।
घटनास्थलमै ज्यान गुमाएका मजदुरको शव पोष्टमार्टमका लागि बेनी अस्पतालमा ल्याइएको छ । घटनाको अनुसन्धान गर्न प्रहरी निरिक्षक सम्मुनत अधिकारीको नेतृत्वमा प्रहरीको टोली पुगेर फर्किएको प्रहरी नायव उपरीक्षक मदन कुँवरले बताए । यस सम्बन्धमा आवश्यक अनुसन्धान गरिरहेको उनले बताए ।
यस कम्पनीले सोही ठाउँमा ३८ मेगावाट क्षमताको निलगिरिखोला जलविद्युत् आयोजना समेत निर्माणधिन अवस्थामा रहेको छ । यसअगाडी समेत बि.स २०७६ साल पुष महिनामा ३८ मेगावाटमा टिप्पर दुर्घटना हुदाँ चालक कुमार चौधरीको ज्यान गएको थियो ।
आयोजनास्थलमा हालसम्म ४ जनाको ज्यान गइसकेको अभिलेखमा देखिन्छ भने बि.स २०७६ भदौ महिनामा सडक खन्ने क्रममा भीरबाट खसेर नारच्याङका २० वर्षीय चुमबहादुर पुर्जा र २९ वर्षीय खिमबहादुर चोचाङ्गी घाइते भएका थिए । आयोजनाले निर्माणधिन अवस्थामा घाईते भएका मजदुरका बारेमा समयमै परिवारका सदस्यलाई खवर नगर्ने गुनासो मजदुरले गर्ने गरेका छन् ।
