अगतिलो ठेकेदारका कारण अलपत्र परेको बेनी अस्पतालको भवन निरन्तरको दबाब र कानुनी कारवाहीको चेतावनीपछि विस्तारै गति लिन थालेको छ । ५० शैया क्षमताको भवन निर्माण कार्यमा ठेकेदारले गति दिएका हुन् ।
बेनी अस्पताल व्यवस्थापन समितिका अध्यक्ष ज्ञानेन्द्र सुवेदीले भवनको ढलान गर्ने काम सकिएको बताए । “अन्तिम तलाको ढलान बिहिबार सकिएको छ,अब काम नरोक्ने बाचा ठेकेदारले गरेका छन्‘अध्यक्ष सुबेदीले भने । पछिल्लो दुई महिनायता भवन निर्माणको कामले निरन्तरता पाएकाले आशा जागेको अध्यक्ष सुवेदीले बताए ।
बुधबार र बिहिबार सहरी विकास तथा भवन डिभिजन कार्यालय बाग्लुङका दुई जना प्राविधिक र अध्यक्ष सुवेदीको निगरानीमा भवन ढलान गरिएको थियो ।
अलपत्र भवन निर्माणका लागि प्रतिनिधिसभाका सांसद खमबहादुर गर्बुजा,गण्डकी प्रदेशका भौतिक पूर्वाधार विकास तथा यातायात व्यवस्था मन्त्री रेशमबहादुर जुग्जाली, प्रदेशसभा सदस्य हरिबहादुर भण्डारी, जिल्ला समन्वय समितिका प्रमुख राजकुमार थापा,बेनी नगरपालिकाका प्रमुख सुरत केसी लगायतले विभिन्न माध्यमबाट ठेकेदारलाई दवाव दिएका थिए ।
अस्पतालको भवनको अपुरो कामलाई पूर्णता दिन प्रधानमन्त्री प्रचण्ड समक्ष समेत टोली पुगेर ठेकेदारलाई कारवाहीको माग गरिएको थियो । अलपत्र भवनको काम सक्न हालै म्याग्दीको भ्रमणमा आएका गण्डकी प्रदेशका मुख्यमन्त्री सुरेन्द्रराज पाण्डे, भौतिक पूर्वाधार मन्त्री रेशम जुग्जालीले समेत जनशक्ति थप र निर्माण सामग्री व्यवस्थापन गरेर तिब्रता दिन निर्देशनका साथै रोकिएको भवन निर्माण कार्य अघि बढाउन चेतावनी दिएका थिए ।
एक वर्षअघि भुतबंगला रहेको भवन निर्माण कार्यले हाल भवनको रुप लिएको बताउदै प्रदेश सांसद हरि भण्डारीले स्वास्थ्य सेवासँग जोडिएको भवनलाई जति सक्दो छिटो सम्पन्न गराउन निरन्तर निगरानी, समन्वय र सहजिकरण गरिने बताए ।
यसअघि वि.स. २०७७ देखि रोकिएको भवन निर्माणको काम गत चैत देखि असार सम्म भएपछि पुन रोकिएको थियो । नयाँ भवन निर्माण नहुँदा ५० शैया क्षमता भएपनि १५ शैयाको संरचना र पूर्वाधारबाट सेवा दिनुपर्ने समस्या छ । नयाँ बनाउन पुरानो भवन भत्काइएकाले छ वर्षयता अस्पतालले अस्थायी संरचनाबाट सेवा सञ्चालन गर्दै आएको छ ।
सघन शहरी तथा भवन निर्माण आयोजना बागलुङले बि.स.२०७३ मङसिर २१ गते भवन निर्माणका लागि महादेव खिम्ती–गल्वा–रफिना जेभीसँग रु. १८ करोड ८४ लाख आठ हजार ८९ मा ठेक्का सम्झौता गरेको थियो । रु. २४ करोड चार लाख २९ हजार ८६९ लागत अनुमान गरिएको थियो । हालसम्म ७० प्रतिशत भन्दा बढी भौतिक प्रगति भएको छ ।
बि.स. २०७६ मंसिर २० गते निर्माण सम्पन्न गर्नुपर्ने सम्झौता थियो ।
चार हजार ९६३ बर्गमिटर क्षेत्रफलमा बनाउन लागिएको चार तले तीन वटा भवनको एउटा भवनको एउटा तला ढलान, झ्यालढोका राख्न, विद्युत, पानी जडान, रंगरोगन र टायल राख्न बाँकी छ ।निर्माण कम्पनीका प्रतिनिधि जोशीले गरेको कामको भुक्तानी समयमा नपाउँदा निर्माण कार्य प्रभावित भएको बताउदै आएका छन् । महादेव खिम्तीका सञ्चालक निर्माण ब्यवसायी महासंघका अध्यक्ष रवी सिंह छन् । नयाँ भवन बनाउन अस्पतालको पुरानो भवन भत्काइएको थियो ।
बहिरंग कक्षको सेवा अस्थाई भवनबाट सञ्चालन गरिएको छ । आकस्मिक र अन्तरंग कक्ष पुरानो प्रशासनिक भवनबाट सञ्चालन गरिएको छ । स्वास्थ्य कार्यालयको भवनमा अस्पताल प्रशासन र व्यवस्थापन समितिको कार्यालय राखिएको छ ।म्याग्दीले पाउनुपर्ने हब अस्पतालको कार्यक्रम पनि भवन नबनेकाले अन्यत्र जिल्लामा गएको अस्पतालका प्रमुख चिकित्सक अञ्जु थापाले बताइन् ।
सघन उपचार कक्ष (आइसीयु) र डायलाइसीस कक्ष पनि स्वास्थ्यकै भवनमा स्थापना भएको छ । १५ शैया क्षमत्ताको अस्पताल २०७२ मा पचास शैयामा स्तरउन्नति भएको थियो । भुकम्प प्रतिरोधी क्षमत्ताको भवन अपाङ्ग मैत्री समेत हुनेछ । भुईतलामा लोन्डरी, मोर्टुअरी, किचन, पहिलो तलामा ईमरजेन्सी, ल्याब, रेडियोलोजी, पहिलो तलामा अपरेशन थियटर, बहिरंग सेवा र अन्तिम तलामा प्रशासन रहने जनाइएको छ ।
