लोकप्रिय थाली नाचकी सर्जक हिरामायाँ पुन श्रीसलाई सम्मान गरिएको छ । लोकवार्ता परिषद् नेपालको १२औं सङ्गोष्ठीको अवसरमा शुक्रबार म्याग्दीको सदरमुकाम बेनीस्थित म्याग्दी बहुमुखी क्याम्पसमा विश्वमै लोकप्रिय थाली नाचको पहिलो अभ्यासकर्ता तथा संरक्षक हाल डेनमार्कमा रहेकी पुन श्रीषलाई सम्मान गरिएको हो ।
पारिवारिक भेटघाटको सिलसिलामा डेनमार्कमा रहेकी हिरामायाँको सम्मान उनकी छोरी अनिता श्रिष थापा र आफन्त गणेश पुनलाई कार्यक्रमका प्रमुख अतिथि जिल्ला समन्वय समिति म्याग्दीका प्रमुख राजकुमार थापा र बेनी नगरपालिका मेयर सुरत केसी लगायतले सम्मानपत्र र दोसल्लाले सम्मान गरेका थिए । वि.स २०२८ सालमा चिमखोलाकी पुनले पहिलो पटक पञ्चेबाजाको तालमा थाली नृत्य प्रस्तुत गरेकी थिइन् ।
वि.स २०४४ सालमा काठमाडौमा भएको सार्क सम्मेलनमा प्रस्तुत भएपछि थालीनाच राष्ट्रिय र अन्तराष्ट्रियकरण भएसँगै म्याग्दीबाट विश्वभर छरिएकाले अहिले थाली नाच प्रस्तुत गर्ने गरेका छन् ।
पुन र लोक गायिका धनकुमारी थापा सहितको ४ जनाको टोलीले वि.स २०४२ मा बिरगञ्जमा भएको तेस्रो राष्ट्रिय लोक नृत्य प्रतियोगितामा सामुहिक थाली नृत्य प्रस्तुत गरेर प्रथम स्थान हाँसील गरेका थिए ।
वि.स. २००८ सालमा चिमखोलामा जन्मिएकी हिरामायाँले सुरुवात गरेको थाली नाच म्याग्दीबाट विश्वभर छरिएका कलाकारहरुले प्रस्तुत दिदाँ विदेशी र नेपालका अन्य जिल्लाबासी समेत दंग पर्ने गरेका छन् ।
बाबा सक्त बहादुर र आमा नन्दिका पुनको ६ भाई छोरा र २ बहीनी छोरी मध्ये कान्छी छोरीको रुपमा जन्मिएकी हिरामायाँ जन्मिएकी हिरामाँयाले खाना खाएको भाँडा बाझेर धारोदेखि घरभित्र जाँदा हातमा थाल घुमाउने गर्दै गर्दा त्यसलाई नाचमा रुपान्तरण भएको थियो ।
हिरामायाँले तत्कालिन समयमा थाली नाच देखाउँदा बोक्सी र टुनामुना गर्ने मान्छे सम्मको आरोपको सामना गर्दा समेत हिरामायाँ नाचलाई फैलाउने अभियानमा निरन्तर लागिन् । बि.स २०३५ सालमा शान्ति पुन र थापाले थाली नाच सम्बन्धि गित रेकर्ड गराएपछि झनै यसको लोकप्रियता चुलिएको थियो ।
उक्त गितको वि.स २०७३ मा म्युजीक भिडीया छायांकन गरिएको थियो । लोकवार्ता परिषद् नेपालबाट शुक्रबार सम्मानित भएकी हिरामायाँ सँगै थाली नाचको संरक्षणमा सक्रिय धनकुमारी थापाले २०४२ सालको नाच राम्रो मानेर २०४४ सालको सार्क सम्मेलनमा समेत थाली नाचका लागि निम्नो आएको बताईन् ।
थाली नाचको कलाकार उत्पादन भएको र गित समेत तयार भएकाले यसको प्रचारप्रसारमा सहयोग पुगेको लोक गायिका थापाको भनाई छ । हातमा थाल राखेर हत्केलाले घुमाई–घुमाई नचाएको र नाचेको दृष्य निकै रोचक हुन्छ।सावधानीपूर्वक गरिने थाली नृत्य मौलिक, आकर्षक र संयमित हुने भएकाले लोकप्रिय बनेको हो।
![](https://myagdikali.com/wp-content/uploads/2023/11/Thali-nach-chimkholaa-6.jpg)
लोकवार्ता परिषद नेपालले १२ औं लोकवार्ता सङ्गोष्ठीको अवसरमा म्याग्दी जिल्लालाई चिनाएबका इतिहासकार कर्ण बहादुर बानियाँ,अमूर्त संस्कृति झांक्री परम्पराका संरक्षक थांइला झांक्रीका नामले परिचित यम बहादुर पुर्जा, यानीमायाँ लोकभाकाका संरक्षण तथा प्रवर्द्धनमा सक्रिय लालदेवी गर्बुजा र लोकगायिका धन कुमारी थापालाई समेत सम्मान गरिएको थियो ।
मौलिकता बोक्ने सांस्कृतिहरुलाई उत्थानमा सक्रिय रहेको लोकवार्ताको सङ्गोष्ठी ७ प्रदेशका प्राज्ञिक व्यक्तित्वहरूको उपस्थितिमा म्याग्दीको मालिका गाउँपालिका–७ बिम, अन्नपूर्ण गाउँपालिका–८ काफलडाँडा र म्याग्दी बहुमुखी क्याम्पसमा सम्पन्न भएको संयोजक प्रतिभा पुनले बताइन् । उक्त कार्यक्रममा ३८ वटा कार्यपत्र प्रस्तुत गरिएको थियो ।