म्याग्दीमा सम्पन्न भएको लोकवार्ता परिषद् नेपालको १२औं सङ्गोष्ठीमा फरक–फरक विधामा पाँचजना सम्मानित भएका छन्। जनजीवनमा प्रचलित संस्कृति,लोककला,साहित्य,संस्कार, रितिथीति आदि परम्परागत ज्ञानको अध्ययन र संरक्षणमा योगदान पुर्याएकालाई लोकबार्ता विशेष समितिले गरेको निर्णयानुसार प्राज्ञिक कार्यद्वारा सम्मान गरिएको हो ।
शुक्रबार म्याग्दी बहुमुखी क्याम्पसमा आयोजित कार्यक्रममा म्याग्दी जिल्लालाई चिनाएका इतिहासकार कर्ण बहादुर बानियाँ, अमूर्त संस्कृति झांक्री परम्पराका संरक्षक थांइला झांक्रीका नामले परिचित यमबहादुर पुर्जा,थालीनाचकी पहिलो कलाकार हिरामायाँ पुन र लोक गायिका धन कुमारी थापालाई जिल्ला समन्वय समितिका प्रमुख राजकुमार थापालेसम्मानपत्र र दोसल्लाले सम्मान गरेका थिए ।
सम्मानित थालीनाचकी सर्जक डेनमार्क रहेकाले उनकी छोरी अनिता श्रीष थापालाई हस्तान्तरण गरिएको थियो । यानीमायाँ लोकभाकाको सर्जक लालदेवी गर्बुजालाई मालिका गाउँपालिका–७, बिममा आयोजित कार्यक्रममा नेपाल प्रज्ञा प्रतिष्ठानका कुलपति भूपाल राई, गाउँपालिका अध्यक्ष बेगप्रसाद गर्बुजाले सम्मान गरेका थिए ।
सम्मानित भएपछि म्याग्दीका इतिहासकार बानियाँले सम्मानका लागि छनौट गरेकोमा आयोजकलाई धन्यवाद दिएका थिए ।मौलिकता बोक्ने सांस्कृतिहरुलाई उत्थानमा सक्रिय रहेको लोकवार्ताको सङ्गोष्ठी ७ प्रदेशका प्राज्ञिक व्यक्तित्वहरूको उपस्थितिमा म्याग्दीको मालिका गाउँपालिका–७ बिम, अन्नपूर्ण गाउँपालिका–८ काफलडाँडा र म्याग्दी बहुमुखी क्याम्पसमा आयोजना गरिएको थियो ।
लोक वार्ताका सामग्रीको सङ्कलन, संरक्षण, संवद्र्धन, अध्ययन, विश्लेषण, प्रचारप्रसार र प्रकाशन गर्नु, जातजाती, धर्म तथा भाषाभाषीको पारस्परिक सद्भाव लोकवार्तासँग सम्बद्ध राष्ट्रिय अन्तर्राष्ट्रिय विद्वान् तथा संघ–संस्थाबीचको सम्बन्धमा गाढा तुल्याउन सफल भएको संयोजक प्रतिभा पुनले बताइन् ।नेपाल सङ्गीत तथा नाट्य प्रज्ञा प्रतिष्ठानसँगको सहकार्यमा आयोजित उक्त सङ्गोष्ठीको सह–आयोजकमा जनकवि केशरी धर्मराज–सावित्री थापा प्रतिष्ठान र प्रवद्र्धकमा नेपाल पर्यटन बोर्ड रहेको थियो ।
