अचानक बिरामी भएपछि मलेसियाको अस्पतालमा भर्ना भएका एक म्याग्देली सहयोगको पर्खाइमा छन् । रोजगारको सिलसिलामा मलेसियामा पुगेका रघुगंगा गाउँपालिका-८, का २६ बर्षिय दिपक छन्त्याल १६ दिनदेखि अस्पतालको बेडमा छटपटाइरहेका छन् । एक्कासी शरीरका विभिन्न अंगमा समस्या देखिएपछिसरकारी अम्पाङ्ग अस्पतालमा भर्ना भएका छन्त्यालको अवस्था जटिल छ ।
आइसियूमा अक्सिजनको सहायतामा उपचार भइरहेको छन्त्यालको उपचार तथा थप उद्धार हुन सकेको छैन् । कम्पनीमा कार्यरत साथीहरुको सहयोगमा अस्पतालसम्म पुगेका छन्त्यालको उपचार तथा परिवारसँगको सम्पर्क सहित उद्धारको आवश्यकता रहेको छ।
अचानक विरामी भएपछि अस्पतालमा भर्ना भएका छन्त्यालको मुटु र मृगौलामा खरावी भएको भन्दै परीक्षण गरिएको छ भने अक्सिजनको सहायतामा उपचार भइरहेको मोना मलेसियाका अध्यक्ष पूर्ण रोका मगरले बताए । ‘अबस्था जटिल छ, अहिले उपचारसहित उद्धारको आवश्यकता छ, अस्पतालमा बिल बढ्दै गएको छ, चिकित्सकले अहिले नै भन्न सकिने अवस्था छैन भन्छन्’ अध्यक्ष रोकाले भने ।
उनले उपचारार्थ छन्त्याल सामान्य बोल्ने अवस्थामा रहेको बताउँदै तत्काल प्रयाप्त सहयोग सहित उपचारमा सघाउनुपर्ने बताए। बिरामी भएर अस्पतालमा भर्ना भएको जानकारीपछि मलेसियाको जोहोर बारु सेनाईबाट ३८० किलोमिटरको यात्रा पछि अस्पतालमा पुगेका अध्यक्ष रोकाका अनुसार मुटु र मृगौलाको परीक्षण भइरहेको छ ।
सरकारी अस्पतालको उपचार खर्च आर्थिक सहयोग जुटाएर मात्रै सम्भव नहुने भएकाले कम्पनी र नेपाली दुताबासमार्फत समेत पहल भइरहेको बताए ।
मलेसियामा रहेका नेपाली संघसंस्थालाई समेत छन्त्यालको उपचारमा सघाउन अनुरोध गरिएको छ । छन्त्यालको स्वास्थ्य अवस्थाका बारेमा नेपाली दुतावासको समेत ध्यानाकर्षण गराइएको बताउँदै जीवमरणको दोसाधमा रहेकोले एनआरएनए सहितका संघसंस्थालाई समेत उनको जीवन रक्षामा विशेष ध्यान दिन म्याग्देलीले माग गरेका छन् ।
