म्याग्दीको सदरमुकाम बेनीमा भइरहेको २१ औं अन्तरमावि जेसिज कप फुटबल प्रतियोगितामा डिफेन्डिङ च्याम्पियन सारदा मावि बिरुद्ध न्यु वेष्ट प्वाइन्ट आवासिय माविका कप्तान समन थापाले उत्कृष्ट फ्रि–किक प्रहार गरे ।
करिब ३५ टाढाबाट हानेको फ्रि किक प्रहार गरेर सोझै गोल परिणत गरेका थियो । जारी प्रतियोगितामा हालसम्म भएका गोलमा फ्रि–किक बाट समनले प्रहार गरेको गोल सर्वोत्कृष्ट गोल मानिएको छ ।
न्यु वेष्ट प्वाइन्ट आवासिय माविका कप्तान समन थापा
न्यू वेष्ट प्वाइन्टबाट विगत तीनबर्ष लगातार म्याग्दी जेसीज कपमा खेलेका समनले मंगला माविसँगको खेलमा एक्लै ४ गोल गरे । फुटबलमा गोलरक्षक बाहेक अन्य सबै पोसिजनमा उत्कृष्ट समन म्यान अफ दी म्याच घोषित समेत भएका छन्। आफ्नो कप्तानीमा मैदानमा उत्रिएका समनले यसपटक उपाधीका लागि आफ्नो टीमका लागि निकै मेहनत गरेका छन्।
पश्चिम म्याग्दीको धवलागिरी गाउँपालिका–३ मुनाका समन न्यू वेष्ट प्वाइन्टमा कक्षा १० मा अध्ययनरत छन् । समनले ३ खेलमा ९ गोल प्रहार गदै सर्वाधिक गोलकर्ताको सूचीमा छन्।
जेसीज कपका खेलाडीहरूको भिडमा माउण्ट एभरेष्ट आवासीय माविका कप्तान सनम विकको चर्चा पनि उत्तिकै कम छैन। शुक्रबार बगरफाँटको सरस्वती आधारभुत विद्यालयलाई एक्लै ६ गोल प्रहार गरेका थिए ।
एउटै खेलमा डबल ह्याट्रिकको रेकर्ड गर्ने खेलाडीमा सनम एक्लै छन् ।पर्वतको जलजला गाउँपालिका–२ मल्लाजका समनले ६ गोल प्रहार गर्दा माउण्टले सरस्वती आधारभुत विद्यालमाथि ११ गोलको वर्षा गरेको थियो । म्याग्दी जेसीजमा दोस्रोपटक खेलिरहेका सनमको खेल्ने शैली नै फरक छ ।
खेलमैदान भित्र सनमको स्वभाव र शैलीबाट खेलाडीसँगै दर्शक समेत उत्साहित छन् । चरम गरिबीसँगै हुर्किएका सनमको उत्कृष्ट कप्तानी र खेलले माउण्ट एभरेष्ट सेमिफाइनलमा प्रवेश गरेको छ ।
म्याग्दी जेसीजमा सदरमुकाम बेनीका दुई निजी विद्यालयका कप्तानको सर्वाधिक गोलकर्ताको प्रतिस्पर्धासँगै उपाधी आफ्नो पक्षमा पार्ने निकै मेहतन गरेको देखिन्छ । ‘दुबै कप्तानले उत्कृष्ट खेल प्रर्दशन गरेका छन्,‘म्याग्दीबाट फुटबलमा सम्भावना भएका खेलाडी पनि हुन्’ म्याग्दी जेसीजका महासचिव कुमार बानियाँले भने ।
उनले फुटबलमा उत्कृष्ट खेल खेलिरहेका खेलाडीलाई अभ्यास तथा अन्य प्रोत्साहनका गतिविधि आवश्यक रहेको बताए । म्याग्दी फुटबल संघका अध्यक्ष समेत रहेका बानियाँले जेसीज कपले विद्यालयस्तरमा रहेका खेल प्रतिभाको पहिचानमा सहज भएको बताए ।
एउटै खेलमा डबल ह्याट्रिकका र ह्याट्रिक गर्ने खेलाडीलाई उचित प्रशिक्षणको आवश्यकताका बारेमा संघमार्फत पहल समेत गर्ने बताए । म्याग्दी जेसीज कपको इतिहासमा सर्वाधिक धेरै २३ विद्यालय सहभागी रहेको प्रतियोगितामा क्वाटर फाइनमा प्रवेश गरेका सदरमुकाम बाहिरको जनप्रिय र हेम मावि सिवाङका साथै बेनी सामुदायिक माविले समेत यसपटक राम्रो खेल देखाइरहेका छन् ।
माउण्ट एभरेष्ट आवासीय माविका कप्तान सनम विक
फुटबल प्रतियोगिताका मुल संयोजक कार्यकारिणी उपाध्यक्ष विनोद घर्तीले जेसीज कपका उत्कृष्ट खेलाडीको छनौट गरी नियमित अभ्यास सहित सरकारी निकायबाट समेत सहयोग गर्न सकेमा म्याग्दीबाट गण्डकी र राष्ट्रियस्तरको प्रतियोगितामा समेत राम्रो खेल देखाउन सक्ने बताए । उनले विगतमा समेत राष्ट्रियस्तरको खेलसम्म पुग्ने धेरै खेलाडीहरु म्याग्दी जेसीज कपमै खेलेको बताउँदै अब सम्भावना भएका खेलाडीलाई प्रोत्साहनमा ढिलाइ गर्न नहुने बताए ।
प्रतियोगितामा बिजेता विद्यालयलाई रनिङ शिल्ड, ट्रफि, मेडल र प्रमाणपत्र सहित नगद रु ५२ हजार २२२ र उपबिजेतालाई ट्रफि, मेडल र प्रमाणपत्रको साथमा नगद रु ३२ हजार २३२ पुरस्कार प्रदान गरिनेछ ।
