नेपाल बास्केटबल संघको आयोजनामा भएको यु-१९ राष्ट्रिय बास्केटबल प्रतियोगितामा म्याग्दीको मंगला गाउँपालिका–१,भर्जुलाका नुकेश जुग्जाली सर्वोत्कृष्ट खेलाडी घोषित भए । काठमाण्डौको गोल्डेनगेट टिमबाट समृद्धि यु–१९ राष्ट्रिय बास्केटबल प्रतियोगिता खेलेका जुग्जाली सेमिफाइनल र फाइनलका सर्वाधिक गोलकर्ता हुन् ।
सेमिफाइनलमा जुग्जालीले १०५ स्कोरमा ४० स्कोर र फाइनलमा १ सयमा २८ स्कोर गदैं सर्वोत्कृष्ट खेलाडीबाट सम्मानित भए ।यु–१९ बास्केटबलमा उदयमान खेलाडीको रुपमा स्थापित भएका १८ बर्षिय जुग्जालीले म्याग्दी जिल्लाबाट दुईपटक गण्डकी प्रदेशस्तरीय प्रतियोगितामा सहभागी भएका थिए ।
गाउँको आर्दश यूवा क्लवबाट सानै उमेरमा बास्केटबल खेल्दै आएका उनको टिमले पोखरामा महानगरपालिद्वारा संचालित विद्यालयस्तरीय बास्केटबल,कीर्तिपुर नगरपालिकाद्वारा संचालित राष्ट्रव्यापापि अन्तर स्थानीय तहस्तरीय बास्केटबल प्रतियोगितामा म्याग्दीको अन्नपूर्ण गाउँपालिकाबाट सहभागी भई विजेता समेत भयो ।
राष्ट्रिय प्रतियोगितामा म्यान अफ दि म्याच घोषित भए ।कलिलै उमेरमा अनु्भवी खेलाडीहरुसँगै खेलमा सहभागी हुने अवसर पाएका जुग्जालीलाई क्लवले प्रतियोगितामा अफर गर्न थालेका छन् । म्याग्दीका साथै पर्वत, पोखरा, काठमाण्डौमा सक्रिय रहेका बास्केटबल क्लवले राष्ट्रिय तथा क्षेत्रीय प्रतियोगितामा म्यान अफ दी म्याच, सर्वोत्कृष्ट, उदयीमान खेलाडी जस्ता अन्य विभिन्न विधाबाट सम्मानित समेत भएका छन्।
गाउँको आदर्श युवा क्लब, कालिपुल युनाइटेड क्लब, बनौ क्लवमा धेरै खेल्ने गरेका जुग्जालीलाई म्याग्दी जिल्ला बास्केटबल टिम कोच बिसन राना, पूर्व म्याग्दी जिल्ला बास्केटबल कप्तान गिमिन पुर्जा,म्याग्दी जिल्ला बास्केटबल कप्तान पुस्कल छन्त्यालले समेत प्रोत्साहन गर्ने गरेका छन् ।
‘बास्केटबलमा अझै राम्रो खेल्ने प्रयास गरेको छु, नेपालको टिमबाट खेल्ने लक्ष्य सहित मेहनत गरिरहेको छु’ जुग्जालीले भने। उनले अहिले विभिन्न राष्ट्रिय च्याम्पियनमा सहभागी हुने अवसरले खेलमा सुधार भएको बताए । उनले विभागीय टोलीमा प्रवेश गरी राष्ट्रिय टिम प्रमुख लक्ष्य रहेको बताए ।
पछिल्लो समय म्याग्दीमा बास्केटबल प्रतियोगिता हुन थालेपछि खेलाडीले अवसर समेत पाइरहेको उनले बताए । जिल्लामा बास्केबलको प्रशिक्षण तथा प्रोत्साहनमा सरकारी निकायबाट सोचेजस्तौ सहयोग नभएको बताए । बास्केटबल खेलाडी जुग्जालीका दाजु मनकुमार जुग्जालीले उचित अवसर पाए बास्केटबलमा राम्रो सम्भावना भएको बताए ।
उनले बास्केटबल खेलका लागि परिवारबाट समेत प्रोत्साहनले थप उत्साहित भएको बताए । बास्केटकलमा राम्रो खेल देखाउन सफल भएपछि सहयोग समेत आउन थालेको बताए ।
उनले जिल्लामा सरकारी निकायबाटै नियमित प्रशिक्षण सहित बास्केटबल खेललाई समेत उच्च प्राथमिकता दिन सकेमा ओझेलमा परेका खेलाडीहरुले अवसर पाउने बताए । यता जिल्ला खेलकुद विकास समितिका अध्यक्ष दिनेश केसीले बास्केटबलका खेलाडीलाई प्रोत्साहन सहितका कार्यहरु गरिएको बताए ।
म्याग्दीमा फुटबल, भलिबलसँगै बास्केटबल निकै लोकप्रिय छ । स्थानीयस्तरमा यूवा क्लवले नै बास्केटबलका लागि पूर्वाधार बनाउने गरेका छन् । युवा पुस्तामाझ यति लोकप्रिय भइसक्दा पनि बास्केटबलको सहभागिता र उपलब्धिका बारेमा स्थानीयस्तरमा प्रतियोगिता सञ्चालन गर्ने संघसंस्थाले भलिबल र फुटबलजस्तै प्राथमिकता भने दिने गरेका छैनन् ।
