बेनी नगरपालिका-९ घतान नेप्टेचौरका सुजन चोखाल यूएईमा सम्पन्न भएको प्रदेशी हातेमालो सहकारी संस्था यूएईले आयोजना गरेको भलिबल प्रतियोगिता उत्कृष्ट खेल देखाउँदै उपाधी जितेका छन् ।
पहिलोपटक देशबाहिर आयोजित भलिबल प्रतियोगितामा सहभागी हुन यूएई पुगेका चोखालले आयोजक प्रदेशी हातेमालो सहकारी संस्था यूएईबाट खेलेका थिए ।प्रतियोगिताको फाइनलमा तनहुँ सेवा समाजलाई सोझो सेटमा हराउँदै आयोजनकलाई नै उपाधी जिताएका थिए ।
२० टिमको सहभागिता रहेको प्रतियोगितामा चोखालले प्रदेशी हातेमालो सहकारीको टिमको कप्तानी गरेका थिए ।उनी प्रतियोगितामा उत्कृष्ट सेटर समेत भए । ५ खेलमा निकै उत्कृष्ट खेल देखाएका थिए ।
‘पहिलोपटक विदेशी भूमीमा खेल्ने अवसर पाए,‘यसपटक अनुभव पनि भयो, खेल पनि राम्रो देखाउन सफल भए’ चोखालले भने । उनले विदेशमा रहेका नेपालीको भलिबलप्रतिको चासो देखेर उत्साहित भएको बताए । चोखाल चम्किएपछि आयोजकले झण्डै ३ लाख २० हजार धनराशीको पुरस्कार समेत जितेको छ ।
राष्ट्रिय टोलीबाट विभिन्न खेलहरूमा सहभागी भइसकेका गण्डकी प्रदेशका सेटर चोखाल विभागीय टोली सहभागी भएका खेलहरूमा समेत हावी हुने खेलाडी हुन्। गाउँघरमा खेतबारी, साँधुरो मैदानमा खेल्दै भलिबल सिकेका चोखाल गाउँबाट जिल्ला, साविकको अञ्चल क्षेत्रीय हुदै राष्ट्रिय टोलीमा पुगेका चोखाललाई पछिल्लो समय ठूला धनराशीका खेलहरुमा समेत अफरै अफर आउने गरेको छ ।
काउलेगौंडा यूवा क्लव(केवाईसी) खेलाडी हुदै नेतृत्व गदैं मेलापर्वमा दर्जनौ खेलमा उपाधी जिताउन सफल भएका चोखालले पारिवारिक तथा आर्थिक समस्यासंगै संघर्ष गदैं मेलापर्वमै जितेको पुरस्कारले घरखर्चमा समेत सघाउने गरेका थिए। क्लवका खेलहरुमा सहभागी भएका चोखाल क्षत्रीय र राष्ट्रिय खेलमा खेल्ने गरेका थिए । जिल्ला भलिबल संघ म्याग्दीले पुरुषतर्फ चोखालले नै नेतृत्व गरी खेल्ने गरेका छन् ।
