म्याग्दीको बेनी नगरपालिका-६ चुत्रेनीको द मनसुन युथ क्लवले बनभोज (पिक्निक) स्थललाई ब्यवस्थित गरेको छ । सदरमुकाम बेनीबजार तथा आसपासका क्षेत्रबाट सबैभन्दा धेरै पिक्निकका लागि जाने चुत्रेनीमा शैचालय, स्टेज, खानेपानी सहित अति आवश्यक संरचना बनाइएको क्लवका अध्यक्ष दिनेश बानियाँले बताए ।
उनका अनुसार सिजनमा विद्यालय, पारिवारिक, संघसंस्थाका बनभोजलाई सहज बनाउन क्लवले मेलापर्व तथा सहयोग जुटाएर ४ लाखभन्दा बढी खर्च गरी संरचना बनाएको बताए । थप संरचना बनाउन समेत क्लवले बेनी नगरपालिका सहित अन्य संघसंस्थासँग समेत सहयोगको अनुरोध गरेको छ । बनभोजस्थलमा एकैपटक धेरै समुहलाई समेत सहज हुने गरी पूर्वाधार बनाउन पहल भइरहेको क्लवले जनाएको छ ।
बनभोजस्थल नजिकै मैदान समेत रहेकाले खेलकुदजन्य गतिविधिका लागि समेत सहज हुन्छ । द मुन सन युथ क्लबले मेलाका साथै सामाजिक एवम् मानवीय सेवामा समेत सक्रिय रहेको छ। मंसिरदेखि माघसम्म म्याग्दीमा बनभोजका लागि सार्वजनिक विदाका दिन घुईचो लाग्ने गर्दछ । बनभोजस्थलमा पुग्नेले समेत सहयोग गर्ने भएकाले संरचना बनाउन सहज हुने गरेको छ ।
