म्याग्दीको मालिका गाउँपालिका–७, बिम बिबोटमा शनिबार अन्धाधुन्ध ढुंगा र दाउरा प्रहारबाट दुई जनाको मृत्यु भएको छ। मानसिक सन्तुलनमा समस्या भएको बिमवाङका टेकप्रसाद रोकाले विहानै दाउरा र ढुंगाले हान्दा ८५ वर्षीया बनसांगो गर्बुजाको घटनास्थलमै मृत्यु भएको थियो भने ८ वर्षीया नातिनी प्रियंका गर्बुजाको उपचारको क्रममा मणिपाल अस्पताल पोखरामा मृत्यु भएको जिल्ला प्रहरी कार्यालय म्याग्दीका प्रहरी निरिक्षक अशोक झाँले बताए ।
‘दुखद् घटना घटेको छ,’अभियुक्तलाई तत्काल नियन्त्रणमा लिएर अनुसन्धान भइरहेको छ‘प्रहरी निरिक्षक झाँले भने । गम्भीर घाईते बर्षिया अमृता जुग्जाली र प्रियंकालाई हेलिकप्टरबाट थप उपचारका लागि मणिपाल अस्पतालमा लगिएको थियो । अभियुक्तले विहान करिब ८ बजे घरमा पुगेर अन्धाधुन्ध ढुंगा प्रहार गरेको बताइएको छ ।
अभियुक्त टेकबहादुरको घरबाट मृतकको घर करिब डेढ किलोमिटर टाढा पर्छ । इलाका प्रहरी कार्यालय दरबाङबाट खटिएको प्रहरीको टोलीले अभियुक्तलाई नियन्त्रणमा लिएर थप अनुसन्धानका लागि जिल्ला प्रहरी कार्यालय बेनीमा ल्याएको छ ।
बृद्धा मनसाङलाई प्रहार भएको देखेर बचाउन गएको अवस्थामा अभियुक्तले अमृता र प्रियंकामाथि नै प्रहार गरेका थिए । यता गाउँपालिका अध्यक्ष बेगप्रसाद गर्बुजाले घटनाबाट सिंगो बिम स्तब्ध भएको बताए । ‘बिम गाउँ नै शोकमा छ, घाईतेको उपचारमा कुनैपनि कमी हुन दिने छैनौ’ अध्यक्ष गर्बुजाले भने । अभियुक्त परिवारबाट अलग भएर एक्लै बस्ने गरेका थिए ।
