रोजगारीका लागि भारत पुगेका श्रीमानको हातमा गम्भीर चोट लागेर अस्पताल भर्ना भएको केही दिनमा पर्वत जलजला गाउँपालिका–४,लामाखेतमा घाँस काट्ने क्रममा रसिला दमाइ भीरबाट लडेर गम्भीर घाईते भइन् । श्रीमानको भारतमा सहयोग जुटाएर जेनतेन उपचार भइरहेको छ तर, रसिलाले आर्थिक अभावका कारण शल्यक्रिया सहित उपचारमा समस्या झेल्नुपरेको छ ।
सुकुम्बासी जिवन विताइरहेकी रसिलाले विगत दु्ईसातादेखि अस्पतालको सैयाबाट उपचारको याचाना गरिरहेकी छन् । मेरुदण्डमा गम्भीर चोट लागेपछि शल्यक्रियाका लागि आवश्यक पर्ने खर्च अभावले झटपटाइरहेकी रसिलालाई यूरोपबाट आशिष परियार, जलजला गाउँपालिकाका साजन परियारले सहयोग जुटाइरहेपनि अझै सल्यक्रियाका लागि प्रयाप्त बजेट अभाव नै छ ।
गएको पुस २० गते लामाखेत नजिकै भिरमा घाँस काटिरहेको बेला अचानक भिर बाट लडेर गम्भीर घाईते भएपछि उपचारमा समस्या भएको आर्थिक संकलन अभियानमा जुटेका साजन परियारले बेनीअनलाइनलाई बताए ।
‘उपचारमा आर्थिक समस्या भइरहेको छ, उहाँलाई अप्रेसन सहित औषधिका लागि पनि सहयोग चाहिएको छ’ परियारले भने । उनले आर्थिक अभावका कारण अप्रेशनमा समेत ढिलाइ भएको बताए । भिरबाट लडेर अचेत भएकी रसिलाको पोखराको गण्डकी मेडिकल कलेजमा उपचार भइरहेको छ ।
Adv
गण्डकी मेडिकल कलेजको बेड नं २७ मा उपचारार्थ रसिलाको मेरुदण्डसँगै घाँटी र शरीरको विभिन्न भागमा चोट लागेको छ ।धन कमाउन भारत पुगेरका श्रीमानको मेसिनले हातमा चोट लागेपछि अहिले रसिलालाई श्रीमान, घरमा रहेका दुई कलिला छोराछोरीको चिन्ताले समेत सताइरहेको छ ।
‘छोराछोरीका लागि म बाँच्नुपर्छ,’बिन्ती छ उपचारमा लागि लाग्ने खर्च सहयोग गरिदिनुहोला’ रसिलाले बेनीअनलाइनलाई भनिन् । उनले उपचारपछि निको भएर मजदुरी गरी छोराछोरीलाई पाल्नुपर्ने बाध्यता रहेको बताईन् । अस्पतालको सैयामा भक्कानिदै याचना गरेकी रसिलाले सहयोग गर्नेलाई जिवनभर नबिर्सिने बताइन् । रसिलाको उपचारमा करिब ३ लाख खर्च हुने बताइएको छ ।
