मगर समुदायले ४२ औं मगर संघ स्थापना एवम् मगर एकता दिवस आज मंगलबार मनाउँदैछन् । मगर दिवसको अवसरमा नेपाल मगर संघ म्याग्दीले संस्थापक अध्यक्ष हेमपुन मगर स्मृति अन्तरमावि सालैजो शिरफुले लोकनृत्य प्रतियोगिताको आयोजना गरेको छ ।
२०३९ साल फागुन १५ गते तनहुँको दमौलीमा मगर संघ स्थापना भएको दिनको सम्मानमा मगर समुदायले यस दिन मगर एकता दिवसको रुपमा मनाउँदै आएका छन् । स्थापना दिवसको अवसरमा दिउँसो परम्परागत भेषभुषासहितको ¥याली प्रदर्शनी तथा सोरठी,सालैजो लगायतका नाचसहित जिल्ला समन्वय समितिको सभाहलमा औपचारिक कार्यक्रम गरिने नेपाल मगर संघका सचिव हिराबहादुर पुनले बताए ।
मगर समुदायले फागुन १५ गते सार्वजनिक विदा दिनुपर्ने, नेपालका प्रथम शहीद भनिने लखन थापालाई राष्ट्रिय विभूति घोषणा गर्नुपर्ने लगायतका माग राख्दै आएका छन् । तर आदिवासी जनजातिमध्ये पहिलो र समग्रमा तेस्रो ठूलो जनसंख्या भएको मगर समुदायको मागलाई सरकारले सधैं बेवास्ता गरेको उनीहरुको गुनासो छ । मगर संघका संस्थापक अध्यक्ष समेत म्याग्दीकै हुन् ।
