एउटै घटनामा छोरा राहुल पक्राउ परेको झन्डै ७ महिनापछि माओवादी नेता कृष्णबहादुर महरा पक्राउ परेका छन्।
यसअघि महराका छोरा राहुल गत भदौ १३ गते पक्राउ परेका थिए। इलेक्ट्रिक सिगरेटमा लुकाइ ल्याएको सुन छुटाउन महरा बाबु छोराले विमानस्थल भन्सार कार्यालयका कर्मचारीलाई दबाब दिएको पाइएको थियो।
सीआईबीले सुरुमा उनीहरूलाई अनुसन्धानमा ल्याउन आनाकानी गरेको थियो। तर भन्सारमा रोकिएको भेप छुटाउन लगातार फोन गरेको बाहिर आएपछि राहुल भने पक्राउ परेका थिए।
कृष्णबहादुर महरालाई भने छुन सकेको थिएन। सुन तस्करी जाँचबुझ गर्न गठित आयोगले कृष्णबहादुर महरालाई मुद्दा चलाउन सिफारिस गरेपछि उनी पक्राउ परेका हुन्।
महरा यसअघि सभामुख रहेकै बेला जबरजस्ती करणीमा पक्राउ परेका थिए। पुर्पक्षका लागि थुनामा गएका महरालाई भने जिल्ला अदालतले सफाइ दिएको थियो।
बाबाछोरा नै हिरासतमा पुगेकाे नमिठो संयोग यसअघि तत्कालीन माओवादीकै नेता टोपबहादुर रायमाझीको पनि छ । नक्कली भुटानी शरणार्थी प्रकरणमा रायमाझीसँगै उनका छोरा सन्दीप रायमाझी पनि पक्राउ परेका थिए । टाेपबहादुर हिरासतमा छन् भने छाेरा सन्दीप भने धराैटीमा छुटेका थिए ।
