म्याग्दीका कलाकार होमलाल पुन र ज्ञानसरा जुग्जाली छन्त्यालको आवाजमा मौलिक पञ्चेवाजाको गीत सार्वजनिक भएको छ । परम्परागत रुपमा गाइने यानीमाया गीतमा समावेश गरिने खालका शव्दहरु समायोजन गरि झिङखानीको तामा सुन मायाली गीत साँगीतिक बजारमा ल्याईएको हो ।
गायक पुनको शव्द र गायीका जुग्जालीको लय सृजनामा रहेको उक्त गीत पुन डिजिटल पोखराको युटुव च्यानलबाट सार्वजनिक गरिएको छ । गीतमा एल.वि.पुनले संगीत संयोजन गर्नुभएको छ भने म्युजिक भिडियोको निर्देशन विल पूर्जा मगरले गर्नुभएको छ । विष्णु थापा मगरले छायाँकन तथा सम्पादन गर्नुभएको भिडियो पोखरामानै खिचिएको हो ।
भिडियोमा म्याग्दी जिल्लाका संस्कृति झल्किने थाली नाँचलाई प्रस्तुत गरिएको छ । जिल्लाको मालिका गाउँपालिका वडा नम्वर २ का गायक पुनले यस अघि पनि केही गीतहरु प्रस्तुत गरिसक्नुभएको छ । लोक संस्कृतिको संरक्षण स्वरुप यानीमाया गीतमा समावेश गरिने शव्दहरु सृजना गरेर मौलिक भाका प्रस्तुत गरिएको गायक पुनले बताउनुभयो । इन्द्र धनुष इन्भेष्टमेन्ट प्रा.ली.को प्रस्तुतीमा रहेको गीतको म्युजिक भिडियोमा पनि मौलिकपन झल्काईएको छ ।
