नेपालकी चर्चित महिला फुटबलर सावित्रा भण्डारी (साम्बा)लाई म्याग्दी प्रवासी नेपाली संघ मोना फ्रान्सले स्वागत तथा सम्मान गरेको छ । फ्रान्सको शीर्ष डिभिजन लिग फुटबल क्लब एना भान गेङगाङ्पमा अनुबन्ध हुनुभएकी साम्बालाई अध्यक्ष देबेन्द्र केसीले कदरपत्र र खादाले सम्मान गर्नुभएको थियो ।
राष्ट्रिय फूटबल टोलीकी स्ट्राइकर साम्बाले नेपाली फुटबलमा अहिलेसम्मकै सफल महिला स्टार खेलाडी साम्बाले विश्व महिला फुटबलको सबैभन्दा शीर्ष लिगमा पुगेर नेपालको शीर उच्च बनाएमा उत्साहित भएको भन्दै सम्मान गरिएको हो ।
सम्मान कार्यक्रममा मोनाका बरिष्ठ उपाध्यक्ष दिल गर्बुजा, महासचिव प्रताप मल्ल, हेमेन क्षत्री, सिर्जना केसी, समाजसेवी अमर भण्डारीको उपस्थिती रहेको थियो । विपन्न परिवारमा जन्मेर संघर्षका पहाड छिचोल्दै राष्ट्रिय टिम हुँदै युरोपेली लिगसम्मको उनको यात्रा धेरैका लागि प्रेरणा र पाठ बनेको मोनाका अध्यक्ष केसीको भनाई छ ।
नेपालमा खेलेर केही हुन्न भन्ने भाष्यलाई गलत सावित गरिदिएकी साम्बा मिहिनेत र प्रतिभा भए संसारका शीर्ष देश र क्लबको ध्यान खिच्न सफल भएको भन्दै साम्बाको सर्वत्र चर्चा हुने गरेको छ ।
