म्याग्दीको रघुगंगा गाउँपालिका-५,झिँस्थित महेन्द्र माविमा स्वर्गीय आमाको स्मृतिमा साढे दुई लाखको अक्षय कोष स्थापना गरिएको छ । रघुगंगा गाउँपालिका-५,झिँ हाल हङकङमा बस्ने मञ्जु पाइजा पुनले आफ्नी स्वर्गीय आमा रामदेवी पाइजाको स्मृतिमा गरिब तथा जेहेन्दार विद्यार्थीलाई सहयोग गर्ने गरी एक कार्यक्रमका बीच उक्त सहयोग हस्तान्तरण गरिएको विद्यालयका शिक्षक होम केसीले बताउनुभयो ।
सहयोगदाता पाइजाले विद्यालयलाई एक थान कलर प्रिन्टर र एक थान साधा प्रिन्टर गरी दुई थान ६२ हजार बराबरको प्रिन्टर सहयोग गर्नुभएको छ ।
अक्षय कोषको ब्याजबाट प्राप्त सहयोगबाट गरिब, विपन्न र जेहेन्दार विद्यार्थीलाई सहयोग गरिने विद्यालयका प्रधानाध्यापक याम शेरपुञ्जाले बताउनुभयो । सहयोग हस्तान्तरण कार्यक्रममा बुबा कलबहादुर पाइजा, श्रीमान युवराज पुर्जा , वडा अध्यक्ष मन बहादुर शेरपुञ्जा, विब्यस अध्यक्ष पदम बहादुर शेरपुञ्जा लगायतको उपस्थिती रहेको थियो ।
