बहराइनमा रहेका म्याग्देलीको साझा संस्था मोना बहराइनको आयोजनामा हुने मोना सांगीतिक साँझको तयारी पूरा भएको छ । राष्ट्रिय आविष्कार केन्द्र नेपालका अध्यक्ष महावीर पुनको अनुसन्धान,नवप्रवर्तन र आविष्कारको लागि स्थापित राष्ट्रिय आविष्कार केन्द्र नेपालको सहयोगार्थ आयोजित मोना सांगीतिक साँझको प्रचारप्रसार सहित तयारी पूरा भएको अध्यक्ष विकास पुनले बताए । मे २ मा चर्चित गायक प्रकाश दुतराज, सम्भोज मल्ल गायिका पूर्णिमा लामा र मोडेल अस्मि थापाको प्रस्तुती रहने सांस्कृतिक साँझ भब्य हुने अध्यक्ष पुनको भनाई छ ।
अध्यक्ष पुनले तत्कालिन समयम गायक गगन पुन कुमर पुन, सुबिन गौचनसँगको सांगीतिक यात्राको स्मरण समेत अहिलेको तयारीको क्रममा भइरहेको बताए । उनले मोना सांगीतिक साँझमा सम्भोज मल्लसँग “पर्खी बसे तिमीलाई“ भन्ने बोलको गीतमा डोयट गर्ने बताए । उनले मोना सांगीतिक साँझमा आर्थिक, नैतिक, भौतिक सहयोग गर्ने सबैलाई धन्यवाद समेत दिए ।
म्याग्दीको अन्नपूर्ण गाउँपालिका-८ नाँगीमा जन्मिएर आविष्कारको क्षेत्रमा सक्रिय महाबीर पुनको अभियानलाई साथ दिन कार्यक्रम गरिएकाले बहराइनमा रहेका नेपालीहरुको समेत उत्साहजनक उपस्थिती हुने छ । मोना बहराइनको अभियानमा मोना अन्तराष्ट्रिय, एनआरएन बहराइन लगायतका संघसंस्थाले समेत सहयोग गरेका छन् ।
सांगीतिक कार्यक्रमबाट हुने मुनाफा रकम महावीर पुनले नेपालमा स्थापना गरेको राष्ट्रिय आविस्कार केन्द्र नेपाललाई सहयोग गरिनेछ । फराकिलो सोच र राष्ट्रको हितमा हिँडेका महावीर पुन कस्ता व्यक्ति हुन् भन्ने बारेमा देश विदेशमा चर्चाको विषय बनेको अवस्थामा मोना बहराइनले सांगीतिक साँझमार्फत थप सहयोगको अभियान सञ्चालन गरेको निर्वतमान अध्यक्ष लोक राम्जालीले बताए ।
