अन्तर्राष्ट्रिय श्रमिक दिवस अर्थात् ‘मे डे’ मा नेकपा (एमाले)को भ्रातृ संगठन नेपाल ट्रेड युनियन महासंघ (जिफन्ट)ले म्याग्दीको सदरमुकाम बेनीबजारमा कार्यक्रम गरी मनाएको छ ।
‘मर्यादित काम, श्रमिकको सम्मानः हाम्रो अभियान’ नाराका साथ एक सय ३५ औँ विश्व मजदुर दिवसको अवसरमा आयोजित कार्यक्रममा बोल्ने बक्ताले गणतन्त्र स्थापनामा मजदुरको योगदान भएपनि सुविधा थप र न्यूनतम आवश्यकता पूरा गर्न भने राज्यका निकाय चुकेको गुनासो गरेका थिए ।
दिवसको उद्घाटन गदैं जिफन्टका उपमहासचिव नरनाथ लुईटेलले मजदुरको पारिश्रमिक, सामाजिक सुरक्षा, समान कामका लागि लैङ्गिक आधारमा पारिश्रमिक तथा सामाजिक सुरक्षामा कुनै भेदभाव नगर्ने लगायतका प्रतिबद्धताहरू पूरा नभएको बताउनुभयो । हरेक पालिकामा मजदुरहरुको सुचिकरण गर्ने, अनौपचारीक क्षेत्रमा पनि श्रमको उचित मूल्य र व्यवस्थापनका साथै स्थानिय तहलाई कामको केन्द्रका रुपमा विकास गर्नु पर्ने उहाँका तर्क थियो ।
नेकपा एमाले म्याग्दीका उपाध्यक्ष प्रमोद श्रेष्ठले मुलुकको विकासका लागि मजदुरको योगदान अतुलनीय रहेकोले उनीहरुको हित र सुरक्षामा सबैले प्रतिबद्धता जनाउनु पर्ने बताउनुभयो । राज्यले पनि मजदुरको सुरक्षाको वारेमा सोच्नु पर्ने बताउँदै श्रमको मुल्य र तोकिएको समयमा पारिश्रमिक पाउने व्यवस्थाका लागि पनि राज्यले नीति बनाएर कार्यान्वयनमा पनि कडाइ गर्नु पर्ने तर्क गर्नुभयो ।
दिवसको अवसरमा म्याग्दी उद्योग वाणिज्य संघका अध्यक्ष सुविन श्रेष्ठ, नेपाल पत्रकार महासंघका उपाध्यक्ष हरिकृष्ण गौतम, म्याग्दी हेभी इक्यूपमेन्ट अपरेटर संघका अध्यक्ष देबेन्द्र चोखालले मजदुरको आवश्यकता पूरा गर्नुपर्नेमा जोड दिएका थिए । सोही अवसरमा अनमी सुमित्रा थजालीले मजदुरलाई स्वास्थ्य सम्बन्धि जानकारी तथा मदिरा र सुर्तीजन्य पदार्थको प्रयोगबाट हुने नोक्सानीका बारेमा प्रशिक्षण दिनुभएको थियो ।
औपचारीक कार्यक्रम भन्दा पहिला नौमती बाजा सहित बेनीको वीरेन्द्रचोकबाट सुरु भएको ¥यालीले मजदुर हितका विषयमा नारा लगाउँदै मंगलाघाट, न्यूरोड, क्याम्पसचोक, अस्पतालचोक, संगमचोक हुँदै बजार परिक्रमा गरेर जिल्ला समन्वय समितिको सभा हलमा पुगेर कार्यक्रममा परिणत भएको थियो । जिफन्ट म्याग्दीका अध्यक्ष राजकुमार राई, स्वागत क्यूपेक नेपालका कार्यवाहक जितबहादुर किसान र सञ्चालन सचिव अर्जुन रानाले गर्नुभएको थियो ।
