म्याग्दीको बेनी नगरपालिका-६,छाप गाउँकी ७६ बर्षिया देवकुमारी बानियाँलाई जहिल्यै पानीको चिन्ता हुन्छ ।आँगनमै धारा जडान गरेपछि लामो समयदेखिको पानीको समस्या समाधान हुन्छ कि भन्नेमा आशा पलाएकी उनी धारा जडान भएको दुई बर्ष वितिसक्दा पानी नआएपछि अहिले निराश छिन् । देवकुमारी जस्तै ६८ बर्षिया कोपिला बानियाँले घरकै छेउमो धारा बनेपछि पानीका लागि दुःखका दिन अन्त्य भएको महसुस गर्न पाएकी छैनन् ।
खानेपानी,जलस्रोत तथा सिंचाई विकास डिभिजन कार्यालयबाट तीनबर्ष अगाडी सुरू भएको काउँले खानेपानी आयोजना प्रयाप्त बजेटको अभावका कारण तीनबर्षसम्म पूर्णता पाएको छैन। आयोजना निर्माणमा भएको ढिलाइले घर–घरमा धाराबाट शुद्ध खानेपानी उपभोग गर्न पाउने आशा गरेका छापाबासी निरास बनेका छन् ।’धारामा पानी आउँछ भनेर कुर्न थालेको पनि धेरै भइसक्यो’ स्थानीय लक्ष्मी केसीले भनिन् ।
उनले पानी नआउँदै धारा पुरानो र भत्किने अवस्थामा पुगेको बताइन् । ‘गाग्री, ग्यालीन, बाल्टिनमा भरेर राखेको पानीले नै खाने, नुहाउने, गाइवस्तुलाई खुवाउने, शौचालयमा प्रयोग गर्नुपर्ने बाध्यता रहेको स्थानीय पूर्णकुमारी बानियाँको भनाई छ । ‘दुईचार महिनामा नै आउँछ भनेको पानी दुईबर्ष बित्दा पनि आउने सुरसारै छैन’ पूर्णकुमारीले भनिन् । धारामा पानी छिट्टै आउने आश्वासन मात्रै दिइरहेको बताइन् ।
अहिले गाउँमा भएको पुरानो धाराबाट पनि निकै कम पानी आउने भएकाले स्थानीयले घर–घरमा जडान गरेको धारामा खानेपानीको आपूर्तीका लागि अनुगमनमा पुगेको टोलीलाई पटक–पटक माग गरेका छन् ।एक घर एक धारा आयोजनामा पानी मिटर जडान समेत गरिने छ । काउँले खानेपानी उपभोक्ता समितिले खोरगैरामा ४४ घरधुरीलाई खानेपानी वितरण गरेको छ ।’अहिले गाउँमा नयाँ धारा छन् तर पानी आउँदैन’, अध्यक्ष कृष्णसिङ बानियाँले भने।
’खाना पकाउनका लागि पनि प्रयाप्त पानी छैन, क्रमागत बजेटको नाममा कनिका छर्केजस्तै बजेट दिएर स्थानीयलाई सास्ती दिने काम भइरहेको छ’ वडा अध्यक्ष बानियाँले भने ।उनले समुदायमै खानेपानीको हाहाकार हुदाँ समेत बार्षिक न्यून बजेटले समस्या भएको बताए । २० हजार घनमिटरको १ वटा र ५ हजार घनमिटरको २ वटा ट्याङ्की सहित धारा निर्माण गरिएपनि पाइप लाइन धारमा जडान र गाड्ने काम बाँकी छ।
कार्यालय प्रमु्ख इन्जिनियर झलकमोहन ओझाले क्रमागत बजेटका कारण खानेपानी आयोजनाले पूर्णता पाउन नसकेको बताए ।‘टुक्रे योजनाले समस्या भएको छ,‘खानेपानीको बाँकी कामलाई समयै सम्पन्न गर्न ताकेता गर्छु’ कार्यालय प्रमुख ओझाले भने ।गत आवमा ८ लाख र चालु आवमा उक्त खानेपानीका लागि १० लाख विनियोजन भएको छ ।
हालसम्म २५ लाख खर्च भएको आयोजनामा मुलबाट ट्याङ्कीसम्मको दूरी १५ सय मिटर छ। अहिलेसम्म १६ घरधुरीमा धारा समेत बनेको छैन । बेनपा–६,पुलाचौरको न्यारी खर्क लगायत ४ वटा मुललाई रिजर्भ ट्याङ्कीमा संकलन गरी वितरण गर्ने लक्ष्य रहेपनि मुहानमा विवाद, पहिरो र पानी सुक्दै जाँदा समस्या भएको कार्यालयले जनाएको छ ।
काँउले–१ मुहान सुकेको छ भने अर्कोमा पहिरो छ । काउले खानेपानी उपभोक्ता संस्थाले कुल ८४ घरधुरीमध्ये अहिलेसम्म १६ घरमा धारा बनाउन बाँकी रहेको छ । यता खानेपानी उपभोक्ता समितिका अध्यक्ष मनोज कार्कीले प्रयाप्त बजेट उपलब्ध गराए ६ महिनाभित्र नै आयोजना सम्पन्न गर्ने दाबी समेत गरे । उनले खानेपानीको बाँकी रहेको काम सकेर छिट्टै धारामा पानी आउने बताए ।
