म्याग्दीको सदरमुकाम बेनीमा रहेको बेनी सामुदायिक माध्यामिक विद्यालयलाई डिजिटल विद्यालय बनाउने अभियानमा करिब २ लाख बराबरको प्रोजेक्टर सहयोग गरिएको छ ।
उत्तरी म्याग्दीको अन्नपूर्ण गाउँपालिका–५, पाउद्धार हाल यूकेमा बस्ने पूर्व सिङ्गापुरे र ब्रिटिस लाहुरे कृष्ण बहादुर तिलिजा पुन मगर, तुलचद्र तिलिजा पुन मगर र हाल पोखरामा बस्ने सुरेश कुमार तिलिजा पुनमगरले प्रति प्रोजेक्टर ६५ हजारको दरले १ लाख ९५ हजार बराबरको तीन थान प्रोजेक्टर सहयोग गर्नुभएको हो ।
सोमबार विद्यालयमा आयोजित एक कार्यक्रममा विद्यालय ब्यवस्थापन समितिका अध्यक्ष सम्मरबहादुर थापा, प्रअ दिपक श्रेष्ठ, सहायक प्रअ काशिराम रेग्मी, भिम घर्तीमगर, शिक्षक अभिावक संघकी अध्यक्ष बलादेवी राईलाई सहयोगदाताको तर्फबाट पूर्व सिङ्गापुरे आर्मी सुरेशकुमार तिलिजा पुनले हस्तान्तरण गर्नुभएको थियो ।
विद्यालयका प्रधानध्यापक दिपक श्रेष्ठले कक्षा कोठाका लागि आवश्यक सबै डिजिटल प्रविधिको प्रयोग गरी पठनपाठन गर्ने अभियानका बारेमा जानकराी गराएपछि उक्त सहयोग गरिएको सहयोगदाताको तर्फबाट सुरेशकुमारले बताउनुभयो । ‘हामीले शैक्षिक अभियानमा निरन्तर सहयोग गर्ने गरेका छौ,यो विद्यालयले म्याग्दी जिल्लाकै गरिमा बढाएको छ’ सरेशकुमारले भन्नुभयो। सहयोग हस्तान्तरण तथा सम्मान कार्यक्रममा विद्यालयले सहयोगदातालाई कदरपत्रले सम्मान गरेको थियो ।
बेनी सामुदायिक डिजिटल अभियान अन्तरगत २३ वटा कक्षाकोठामा प्रोजेक्टर प्रयोग गरी इन्टरनेटका माध्यमबाट पढाउने, शिक्षक, विद्यार्थी र अभिभावकलाई समेत सूचना प्रविधिमैत्री तालिम सञ्चालन गरिने, विद्यार्थीलाई प्रविधिमैत्री वातावरणमा पठनपाठन सहितको योजना बनाएर बेनी सामुदायिक डिजिलट विद्यालय अभियान सुरु गरिएको विद्यालयका प्रअ श्रेष्ठले बताउनुभयो ।
हाल विद्यालयमा ५ वटा कक्षाकोठामा प्रोजक्टर जडान गरी पठनपाठन भइरहेको छ ।यसअगाडी समेत विद्यालयकै प्रअ श्रेष्ठको पहलमा बेनपा–५ पूलाचौरको दलित बस्ती पुरुन्नेमा यूके निवासी तुलचन्द्र तिलिजाको अगुवाईमा भौतिक पूर्वाधार बनाउन २ लाख ४० हजार नगद सहयोग गर्नुभएको थियो।
