फोक्सोको क्यान्सर जितेका जोर्डन क्षेत्रीले सफलतापूर्वक सगरमाथा आरोहण गरेका छन् । उनले आइतबार बिहान १० बजेर ३० मिनेट जाँदा सगरमाथामा आरोहण गरेका हुन् । उनले १४ घण्टा लगाएर सगरमाथाको आरोहण गरेका जोर्डनका बुवा बेलायतबासी नेपाली एनआरएनए अभियन्ता योगेन क्षेत्रीले बताए।
जोर्डनलाई गेल्जे शेर्पा, एड्रियाना र फुडी शेर्पाले सगरमाथा चढ्न सहयोग गरेका थिए । जोर्डनलाई सानै उमेरमा फोक्सोको क्यान्सर भएको थियो। क्यान्सर लागेदेखि नै उनलाई एक दिन सगरमाथा चढ्छु भन्ने आत्मविश्वास थियो। सोही आत्मविश्वासलेनै उनलाई आज उक्त सफलता हात परेको छ।
सगरमाथाको बेसक्याम्पबाट जोर्डनले भनेका थिए, ‘सानै उमेरमा कठिन रोगबाट जुन संघर्ष मैले गरेँ। त्यतिबेला हौसलाको खाँचो थियो। मेरो जस्तै जटिल रोग बाट गुज्रिरहेकालाई मेरो सगरमाथा आरोहण प्रेरणा बनोस्।’
‘छोरा जोर्डन छेत्रीको सगरमाथा आरोहण यात्रामा तपाईंहरुले दिनुभएको दयालु शब्द, प्रोत्साहन, शुभकामना र तपाईंको समर्थन हाम्रो लागि धेरै महत्त्वपूर्ण छ । तपाइहरुले दिनुभयको शुभकामना सन्देश र आशिर्वादको लागि हामी कृतज्ञ छौं।’ जोर्डनका बुबा योगेन छेत्रीले भनेका छन् ।
