मौलिक सिर्जनाहरूबाट स्रोता-दर्शकको मन जितिरहेका लोकप्रिय गायक एवं सर्जक प्रकाश दुतराजको नयाँ गीत ‘करिम’ सार्वजनिक भएको छ ।
नेपाली सांगितिक क्षेत्रमा एउटै स्वादका गीतबाट आजित भएका दर्शकश्रोतलाई नयाँ र फरक शैलीले गीत पस्किदै आएका गायक दुतराजले शोषण, दमन र चरम गरिबीको सामाना गदैं आएका बादी समुदायको कथाबस्तुमा केन्द्रित भएर ‘करिम’बोलको नयाँ गीत सोमबार राति दर्शक तथा स्रोतामाझ ल्याएका हुन् ।
नेपालमा बादी समुदायका चेलीहरूको कथामा आधारित गीतमा राजनीतिक परिवर्तन भएपनि बादी समुदायको दैनिकी उस्तै रहेको देखाउने प्रयास गरिएको गायक दुतराजको भनाई छ ।
‘अहिले पनि यो समुदाय प्रयोग भइरहेको छ, परिवर्तनको अनुभुती गर्न पाएको छैन, नेपाली समाजमा दोस्रो दर्जाको नागरिक सरह बाँच्नु परेको छ’ दुतराजले बेनीअनलाइनसँग भने ।
बादी समुदायले बाध्यात्मक देहव्यापारमा लाग्नुपर्ने अवस्थालाई म्यूजिक भिडियोमा देखाइएको छ । यसभन्दा अगाडी रिमैको म्यूजिक भिडियोमा राउटेको कथा प्रस्तुत गरेका गायक दुतराजले यसपटक सुदुर पश्चिमकै बादी समुदायको कथा दुखदायीलाई म्यूजिक भिडियोमा देखाएका छन् ।
दैनिक के खाउँ र के लाउँ भन्ने पीडामा रुमल्लिएका अल्पसंख्यक बादी समुदायका महिला आफ्ना साना नानीलाई मीठो खाने कुरा लिएर आउने आशमा झुपडीमा बिताउनु परेको छ । गीतमा दुतराज र गायिका शान्तिश्रीको स्वर रहेको छ भने शब्द तथा संगीत पनि गायक स्वयंकै हो । अनिल के. मानन्धरको छायाँकन रहेको गीतमा नविन घर्ती मगरले निर्देशन गरेका छन् ।
म्याग्दीको मंगला गाउँपालिका-५,अर्मनमा जन्मिएका साधारण र हसिलो स्वभावका गायक दुतराजका हरेक सांगितिक कोशेली बालबालिका देखि बृद्धबृद्धासम्मको जिब्रोमा उनको गीत गुन्जिन्छ। ‘जाम भो माईली एल्बमको ‘लाहुर जाने रेलैमा’, आरने, बैनी झ्यालैमा, घर कता हो बैनीको, ‘रिमै’ गीत करोड क्लवका गीत हुन् । समाजमा दविएका र दवाइएकाहरुको आवाजले समेत प्राथमिकताका बहसको अवसर पाउँछ ।
