म्याग्दी जिल्लाकै पहिलो सामुदायिक क्याम्पस म्याग्दी बहुमुखी क्याम्पसको प्रमुखमा श्रीधर सुवेदीलाई चयन गरेर मंगलबार पदस्थापन गरिएको छ । क्याम्पस प्रमुख गोरखबहादुर जिसीको कार्यकाल सकिएपछि खुल्ला प्रतिस्पर्धाबाट चयन हुनुभएका सुवेदीलाई एक समारोहका बीच पदस्थापन गराइएको हो ।
पदस्थापनमा बोल्दै सुवेदीले आफ्नो तर्फबाट क्याम्पसलाई उच्च बिन्दुमा पु¥याउनका लागि प्रयास गर्ने बताउनुभयो । उहाँले म्याग्दीमा मेरो पहिलो घर भनेकै म्याग्दी क्याम्पस भएकाले यसको हित बिपरीत कुनै पनि कार्य नगर्ने र हुन पनि नदिने उहाँले जनाउनु भयो ।
२०४८ सालमा स्थापना भएको म्याग्दी बहुमुखी क्याम्पस जिल्लाकै शैक्षिक धरोहर भएकाले पनि यस संस्थाको उन्नती र संस्थाले पाएका उपलब्धीहरुको रक्षा गर्दै थप प्रगति तर्फ लैजानु पर्ने जिम्मेवारी हरेकको उहाँको भनाई थियो । संस्थाले दिएको जिम्मेवारी पुरा गरेर सबैलाई समेट्दै अगाडी बढ्ने योजना रहेको उहाँको तर्क थियो ।
पदस्थापनमा म्याग्दी क्याम्पसका संरक्षक हरिकुमार श्रेष्ठले बिगतको तुलनामा म्याग्दी बहुमुखी क्याम्पसमा धेरै फेरबदल आएको र सुधार भएकोले पद लिने तर समय नदिने व्यवहार कसैले पनि गर्न नहुने बताउनुभयो । उहाँले क्याम्पस प्रमुख चयनमा प्रतिस्पर्धात्मक तबरले भएको छ र यहाँ संधै जसो यस्तै बिधिबाट हुने भएकाले अहिले छनौटको समयमा पछाडी पारेकाले औंला उठाउने मौका नपाउने गरी कार्य सम्पादन गर्न आग्रह गर्नुभएको थियो । म्याग्दी क्याम्पस क्युएए प्राप्त गरेको शैक्षिक संस्था भएकोले त्यसलाई नबिकरण गर्ने जिम्मेवारी पनि नयाँ प्रमुखको भएकाले तदारुकता साथ उक्त जिम्मेवारी पुरा गर्नका लागि सबैलाई समेटेर अगाडी बढ्न सुझाब दिनुभएको थियो ।
म्याग्दी क्याम्पसका निवर्तमान अध्यक्ष बालकृष्ण सुवेदीले क्वालिटि म्याग्दी क्याम्पसको मुख्य पाटो भएकोले अब आएका प्रमुखले पनि क्वालिटिलाई अझ राम्रो बनाउनु पर्ने तर्क गर्नुभयो । सञ्चालक समितिमा बायोडाटा बढाउन मात्रै हैन काम गर्न आउनु पर्छ–उहाँले भन्नुभयो । कतिपय साथीहरु क्याम्पस सञ्चालक समितिमा आफ्नो बायोडाटा बढाउन मात्रै आएको जस्तो पनि देखिन्छ त्यस्ता व्यक्तिहरु बाहिरै बस्दा क्याम्पसको हित हुन्छ ।
क्याम्पसका उपाध्यक्ष दिपेन्द्र श्रेष्ठले अहिले पछिल्लो समय विद्यार्थी संख्या कम हुँदै गएको अवस्थामा विद्यार्थी बढाउने र गुणस्तर पनि अझै मजबुत बनाउन तर्फ सोच्नु पर्ने तर्क गर्नुभयो । सबैले काम गर्छन् तर उत्कृष्ट को भन्ने सवाल हुन्छ त्यसैले प्रतिस्पर्धीहरु मध्ये सबै उत्कृष्ट नहुने भएकाले यसबारेमा पनि सोच्नु पर्छ । कुनै पनि मिटिङ भन्दा पहिला नै एजेन्डा तय हुनु पर्छ र मात्रै मिटिङमा मजबुत छलफल हुन्छ त्यसैले त्यसका बारेमा पनि ध्यान दिनु पर्ने हुन्छ ।
म्याग्दी बहुमुखी क्याम्पस सञ्चालक समितिका अध्यक्ष सोमनाथ ढुंगानाको अध्यक्षता, सञ्चालन नारायण सुवेदीको सञ्चालनमामा भएको पदस्थापन समारोहमा पब्लिक क्याम्पस प्रध्यापक संघका सभापति प्रेम जिसीले शुभकामना मन्तव्य राख्नुभएको थियो ।
