म्याग्दीको बेनी नगरपालिका-९, गलेश्वरमा रहेको गलेश्वर पुलस्त्य पुलह अन्नक्षेत्रको विशेष अधिवेशनपछिको दोस्रो साधारणसभा सम्पन्न भएको छ । साधारणसभामा अन्नक्षेत्रका अध्यक्ष ज्ञानेन्द्रप्रसाद सुवेदीले प्रगति र कोषाध्यक्ष लोकेन्द्रबहादुर खड्काले आर्थिक प्रतिवेदन प्रस्तुत गरेका थिए ।
साधारणसभाको उद्घाटन गर्दै बेनी नगरपालिका–९, घतानका कार्यवाहक वडा अध्यक्ष गणेश शर्माले गलेश्वर क्षेत्रलाई धार्मिक पर्यटनको केन्द्रका रुपमा विकास गर्नुपर्ने आवश्यकता औंल्याएका छन् । उनले वडा कार्यालय तथा नगरपालिकामार्फत नगर क्षेत्रमा रहेका धार्मिक, पर्यटकीय र ऐतिहासिक सम्पदा, मठमन्दिरको विकास तथा प्रवद्र्धनमा जोड दिइएको बताउँदै धार्मिक पर्यटन वृद्धि गर्न सबैले आ–आफ्नो ठाउँबाट पहल गर्नुपर्ने बताए ।
गलेश्वर शिवालय क्षेत्र विकास कोषका अध्यक्ष माधवप्रसाद रेग्मीले गलेश्वर शिवालय क्षेत्र विकास कोषले समग्र गलेश्वर क्षेत्रको विकास र प्रवद्र्धनमा काम गरिरहेको बताए । उनले विगतको तुलनामा अहिले गलेश्वर आसपासको क्षेत्र र गलेश्वर मन्दिर परिसरमा भौतिक पूर्वाधार निर्माणले तीव्रता पाएको बताउँदै धार्मिक पर्यटनको विकास गर्न सबै सरोकारवाला एक भएर अगाडि बढ्नुपर्ने बताएका थिए ।
कार्यक्रममा गलेश्वर ज्येष्ठनागरिक आश्रमका अध्यक्ष बमबहादुर पुन, गैरसरकारी संस्था महासंघ नेपाल जिल्ला शाखा म्याग्दीका अध्यक्ष दिपक पौडेल, पत्रकार महासंघ म्याग्दी शाखाका उपाध्यक्ष हरिकृष्ण गौतम र गलेश्वर आमा समूहका अध्यक्ष कुमारी रोकाले शुभकामना मन्तव्य व्यक्त गरेका थिए । कार्यक्रम अन्नक्षेत्रका अध्यक्ष सुवेदीको अध्यक्षता, उपाध्यक्ष यामबहादुर खत्री सुवेदीको स्वागत र सचिव ताराप्रसाद आचार्य (बाबुराम)को सञ्चालनमा सम्पन्न भएको थियो ।
मुस्ताङमा अवस्थित प्रसिद्ध मुक्तिनाथ मन्दिरको मुख्य प्रवेशद्वारको रुपमा रहेको गलेश्वर पुलस्त्य पुलह अन्नदान क्षेत्रले दैनिकजसो करिब ६० जनालाई निःशुल्क रुपमा भोजन गराउँदै आएको छ । यस संस्थाले स्थापनाकालदेखि नै साधुसन्त, तीर्थयात्री, ब्राह्मण, बटुक विद्यार्थी, अनाथ, असहाय लगायतलाई भोजनको व्यवस्थापन गरेको जनाएको छ ।
