म्याग्दीको बेनीमा जारी जिल्ला क्रिकेट लिग प्रतियोगिताको फाइनल पुग्नका लागि चारै टिमका लागि समान अवसर देखिएको छ । जेठ ५ गते देखि शुरु भएको ४ टिम सहभागी रहेको जिल्ला लिगको दोश्रो चरणको खेल सकिदा सम्म सबै टिमले समान दुई दुई अंक हासिल गर्दै फाइनल पुग्ने सम्भावना समान देखाएका हुन् ।
जेठ ५ गते भएको पहिलो चरणको खेलमा रिभरसाइड बगरफाँट र बेनी नगरपालिका बिजयी भएर दुई दुई अंक हासिल गरेका थिए भने दोश्रो चरणको खेलमा म्याग्दी क्रिकेट क्लब र रत्नेचौर क्रिकेट समुहले विजयी हासिल गर्दै फाइनल पुग्ने सम्भावना जिवित राखेका छन् ।
चार टिम रहेको लिगमा सबै टिमले तीनतीन खेल खेले पछि शिर्षस्थानमा रहेका दुई टिम फाइनल प्रवेश गर्ने र १२ गते शनिबार फाइनल खेल हुनेछ । बिहीबार भएको खेलमा विजयी हासिल गर्दै म्याग्दी क्रिकेट क्लब नेट रनरेटका आधारमा शिर्षस्थानमा पुगेको छ । रिभरसाइड बगरफाँट दोश्रो, रत्नेचौर क्रिकेट समूह तेश्रो र बेनी नगरपालिका चौथो स्थानमा रहेका छन् ।
शुक्रबार बेनी नगरपालिका र रत्नेचौर क्रिकेट क्लब तथा म्याग्दी क्रिकेट क्लब र रिभरसाइड बगरफाँट बिच खेल हुने र दुवै खेलका विजेताहरु फाइनल प्रवेश गर्ने जिल्ला क्रिकेट संघ म्याग्दीका अध्यक्ष प्रविण पौडेलले जानकारी दिनुभयो ।
बिहीबार भएको खेलमा बेनी नगरपालिकालाई ९ विकेटले पराजित गर्दै म्याग्दी क्रिकेट क्लब विजयी भएको छ । त्यस्तै रिभरसाइड बगरफाँटलाई पराजित गर्दै रत्नेचौर क्रिकेट समूहले आफ्नो फाइनल पुग्ने सम्भावनालाई जिवित राखेको छ ।
बेनी नगरपालिकाले १९ ओभरमा अलआउट हुँदै ९८ रन बनाएको थियो । जवाफी ब्याटमा उत्रिएको म्याग्दी क्रिकेट क्लबले ११ ओभर ३ बलमा १ विकेट गुमाएर लक्ष भेटेको थियो ।रत्नेचौर क्रिकेट समूहले निर्धारीत २० ओभरमा ४ विकेट क्षतीमा १७० बनाएको थियो । जवाफी ब्याटीङमा उत्रेको रिभरसाइड बगरफाँटले २० ओभर खेल्दै १६३ रन बनाएको थियो ।
