पश्चिम म्याग्दीको दरबाङमा अवस्थित के.वि एकेडेमी एण्ड मन्टेश्वरी हाउस प्रालिले चालु शैक्षिक वर्षमा विद्यालयमा नयाँ भर्ना भएका विद्यार्थी र उनीहरुका अभिभावकलाई शुक्रवार भव्य कार्यक्रमका विच स्वागत गरेको छ ।
छ्यारछ्यारे स्थित सभाहलमा कार्यक्रमको आयोजना गरेर नवआगन्तुक विद्यार्थी,अभिभावक र शिक्षकलाई स्वागत गर्नुका साथै गत शैक्षिक वर्ष २०८० मा उत्कृष्ट नतिजा प्राप्त गर्न सफल विद्यार्थीहरुलाई पुरस्कार वितरण गरिएको थियो ।
विद्यार्थी र अभिभावकहरुले खचाखच भरिएको सभाहलमा विद्यार्थीहरुले विभिन्न गीत र नृत्य प्रस्तुत गरेका थिए ।
विद्यालयका प्रिन्सिपल विमल शर्माले चालु शैक्षिक वर्षमा विद्यालयमा भर्ना भएका ६० जना विद्यार्थीहरुलाई स्वागत गर्दै सम्पूर्ण विद्यार्थीहरुको उज्ज्वल भविष्यका लागि विद्यालयले शैक्षिक गुणस्तर,अनुशासन र अतिरिक्त क्रियाकलापहरुमा जोड दिने बताउनुभयो ।
त्यसैगरी विद्यालयका संचालक तथा प्रवन्ध निर्देशक हिरा पुनले व्यवहारिक,सीपमूलक र जीवनोपयोगी शिक्षा प्रदान गर्न विद्यालय प्रयत्नरत रहेको र त्यसका लागि आवश्यक साधन सहितका पूर्वाधारहरु पनि तयार पारिएको बताउनुभयो । विद्यालयले अभिभावक लक्षित कम्प्यूटर कक्षा र विद्यार्थी लक्षित कृषि शिक्षा समेत सुरु गर्न लागेको जानकारी दिनुभयो ।
कार्यक्रम शिक्षक मीनबहादुर सुनार र विमल पुनको संचालन तथा ध्रुवसागर शर्माको स्वागत मन्तव्यमा सम्पन्न भएको थियो ।
